بقي لنا فترة طويلة ماشوفناش فيلم يرجعنا للماضي الجميل.. فيلم يوم من الأيام اللي شوفناه مؤخرًا كان محاولة جيدة لإرجاعنا لرومانسية الزمن الجميل، لكن للأسف المحاولة تاهت وسط محاولة صناع الفيلم أنهم يوصلوا للمشاهدين رسائل سياسية واجتماعية كتيرة.. وكان من الأفضل أن الفيلم يركز في الجانب الرومانسي.
يوم من الأيام من تأليف وليد يوسف، ومن إخراج محمد مصطفي وبطولة محمود حميدة ولطفي لبيب وهبة مجدي مع حسن عبد الله وأحمد حاتم.
الفيلم بيستعرض عدد من قصص الحب اللي بتدور في أحد الأتوبيسات بين القاهرة والمنصورة.. قصص الحب بتتشابك مع بعضها البعض، ومع كتير من القضايا اللي بتتناول قضايا الشباب والإرهاب وكتير من القضايا الاجتماعية والإنسانية اللي بتدور في مصر مؤخرًا.
يمكن بسهولة نشبه الأتوبيس بمصر، أو بالمجتمع اللي عايشين فيه، ونقدر نشوف في كل شخصية من الشخصيات اللي بنشوفها في الفيلم أشخاص عايشين وسطنا، أو يمكن نشوف فيهم أشخاصنا إحنا!
المميز في الفيلم كان الأداء التمثيلي لمحمود حميدة، لكن نفس القوة في الأداء لم تكن حليفة باقي أبطال الفيلم للأسف الشديد، خاصة ممثلة زي هبة مجدي شوفناها في كتير من الأدوار في الفترة الماضية، وللأسف أداءها التمثيلي كان ضعيف.
السيء في الفيلم كان رغبته في حشر كتير من الرسائل الاجتماعية والإنسانية في الأحداث، الأمر اللي سبب ثقل علي سيناريو الفيلم، بالإضافة للحوار اللي كان مباشر في كتير من أجزاؤه، والمفروض أن الفن هو تقديم الرسالة تحت غطاء من الإنسانية والرومانسية، مش استهداف المشاهدين بشكل مباشر من خلال الحوار.
استخدام الأتوبيس لتصوير معظم أحداث الفيلم كان مميز، ونقطة جديدة وجيدة لازم نلفت الانتباه لها، كمان كادرات الفيلم وأسلوب التصوير كان متميز رغم المساحة الضيقة اللي بيدور فيها، كمان الموسيقى التصويرية وأغاني الفيلم كانت جيدة جدًا ونقلتنا لحالة جميلة من الرومانسية كنا نتمنى أنها تستمر معانا لنهاية الأحداث، لولا الرغبة في توجيه رسائل تانيه زي ما قولنا.
يوم من الأيام فيلم رومانسي بينقلنا لزمن الحب الجميل، وبيخلينا نشوف نجوم كان نفسنا نشوفهم من زمان.. فقط كان محتاج شوية مجهود زائد وتركيز على الفكرة الأساسية من الفيلم.
علشان تبقي عارف:
- الفيلم يعتبر التعاون الثالث بين المنتج حسين القلا والمخرج محمد مصطفى بعد فيلمي (أوقات فراغ، الماجيك).
- بنشوف في الفيلم أول ظهور سينمائي للفنانة مشيرة إسماعيل منذ عام 1989.
أكتب تقييم
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
