The Definitive Guide to Living in the Capital , Cairo , Egypt

توقعاتنا المبدئية عن فيلم Bad Santa في الجزء الثاني منه كانت بتقول إننا ممكن نكون أمام فيلم كوميدي استثنائي، لكن للأسف النتيجة النهائية اللي شوفناها على الشاشة كانت فيلم أعياد معتمد في المقام الأول على النكت الجنسية اللي بتخرج من أفواه السكرانين… الفيلم كان عامل زي نكتة قبيحة، لكن حتى النكت القبيحة ممكن تضحكنا أكثر من كده شوية!

فيلم Bad santa 2 من إخراج مارك واترز، وبطولة بيلي بوب ثورنتون، بريت كيلي، مع كريستينا هندريكس، وتوني كوكس، وريان هانسن، وجيني زيجرينو.

الفيلم بيحكي عن (ويللي) اللي بيقوم بدوره بيلي بوب ثورنتون واللي بيعاني من اليأس في حياته وعدم إحساسه بفايدتها، حتي أنه بيحاول ينتحر في المشهد الإفتتاحي للفيلم، لكن الصدفة وحدها بتبعده عن مصير الإنتحار وبتضعه في تنظيم عصابي بيستهدف سرقة حفل تابع لجمعية خيرية كبيرة، الأمر اللي –المفروض- ينتج عنه مشاهد كوميدية كبيرة.

مساحة الكوميديا في الفيلم كانت قليلة جدًا، واعتمدت في جانب كبير منها على التلميحات الجنسية والنكات الخارجة، لكن مانقدرش ننكر أن بعض المشاهد كانت مضحكة فعلًا لكن مش بالقدر اللي كنا متوقعينه.

الأداء التمثيلي لأبطال الفيلم كان ضعيف ونمطي ومحفوظ، وكل شخصية كانت بتؤدي المطلوب منها وخلاص بدون أي مجهود لتقديم الأدوار دي بعمق أو حتى بطريقة غير تقليدية. يعني كل واحد كان بيستسهل وكأن وراه حاجة تانية وعايز يخلص دوره علشان يلحقها.

بالنسبة للديكورات نقدر نقول أنها كانت متميزة، وميز الفيلم كمان التصوير الخارجي وشوفنا مشاهد حلوة قوي لتساقط الثوج، لكن في المقابل الموسيقى التصويرية لم تكن بنفس القوة، وحسينا أنها مستهلكة ومافيهاش تجديد ومافيش حاجه منها علقت في ذهننا أو حسينا أننا محتاجين نسمعها بشكل منفصل.

فيلم Bad Santa 2 فيلم خاص بمواسم الأعياد، ومش بيقدم أكثر من شوية كوميديا ضعيفة وتلميحات غير ظريفة.

علشان تبقى عارف:

الممثلة لورن جراهام كان المفروض تقوم بدور في الفيلم، لكنها اعتذرت لارتباطها بفيلم Gilmore Girls: A Year in the Life. وده من حسن حظها بالمناسبة.