The Definitive Guide to Living in the Capital , Cairo , Egypt

في نهاية السبعينيات وبداية الثمانينيات، تم عرض مسلسل شهير بيحمل اسم CHIps عن اتنين من أفراد الشرطة بيقعوا في مشكلات كوميدية طوال الوقت.

المسلسل حقق نجاح كبيرة وحصد عدد كبير من المشاهدات في كل أنحاء العالم، علشان كده بيتم تحويله اليوم لفيلم بيحاول يعتمد على نجاح المسلسل المضمون. وهي دي العادة هذه الأيام في هوليوود، إعادة تقديم واستنساخ كل الأفلام والأعمال الدرامية، وتقديمها من جديد.

فريق العمل

فيلم Chips من تأليف وإخراج داكس شيبرد ومن بطولة مايكل بينا وداكس شيبرد وجيسكا ماكنيم. والحقيقة أن مشاركة مايكل بينا في الفيلم بتعتبر من زياراته الكوميدية القليلة نسبيًا لعالم السينما.

قصة الفيلم

الفيلم بيحكي عن (فرانك بونشيريلو) و(جون بيكر) الشرطيين في الدورية الأمريكة الخاصة بالطرق السريعة، واللي بيوقعهم القدر وأسلوب تصرفهم في عدد كبير من المشكلات اللي لها طابع كوميدي، واللي بيزيد مع طريقة تعاطي الشريكين مع المشكلات دي ومحاولاتهم الشخصية إنهم يحلوها ويضعوا بصمتهم الشخصية عليها.

الإخراج والسيناريو

من اللحظة الأولى كان واضح أن السيناريو معتمد على الكيمياء بين الشريكين فران وجون، وبدون الحالة دي من الإنسجام بين الأثنين كان الفيلم هيكون سيء جدًا، والحقيقة إن الفيلم راهن رهان صحيح وكانت الكيمياء والانسجام هي المحرك الأساسي للكوميديا في الفيلم، بالإضافة لاهتمام السيناريو بخلق كتير من المواقف الكوميدية واللي تم استغلالها بشكل ناجح في النهاية.

الموسيقي والديكور والتصوير

الموسيقى قدرت تفرض نفسها علينا وتقدم مجموعة من الأغاني والمقطوعات الموسيقية المتميزة، كمان حركة الكاميرا السريعة والخاطفة كانت مميزة وساعدت على سرعة رتم الفيلم وعدم شعورنا بالملل، أما الديكورات فكانت نقطة ضعف الفيلم وحسينا إنها مكررة ومافيهاش أي نوع من التجديد.

الخلاصة

فيلم CHiPs فيلم كوميدي جيد ينفع تقضوا أمامه وقت لطيف في الويك إند. لكن لا تتوقعوا منه أكثر من الكوميديا.

علشان تبقى عارف:

(كريستيان بيل) و(داكس شيبرد) متزوجان ولديهما أطفال في الحياة الواقعية.