The Definitive Guide to Living in the Capital , Cairo , Egypt

ياترى ممكن تعمل إيه علشان الإنسانة اللي بتحبها؟ وإلى أي درجة مستعد تضحي علشانها؟ وإيه الحدود اللي هتقف عندها وتقول أنا مش هقدر أكمل أكتر من كده؟ هو ده السؤال الأساسي اللي هيخطر على بالك لما تتفرج على فيلم Collide، واللي بنعتبره واحد من أفضل أفلام الأكشن اللي شوفناها مؤخرًا. تعالوا نتكلم عن الفيلم بالتفصيل.

فريق العمل

الفيلم من تأليف وإخراج إيران كريفي ومن بطولة نيكوﻻس هولت وفيليستى جونز وأنتوني هوبكنز مع بن كنجسلي وتوماس بيندر.

ومن الأمور الجيدة في الفيلم أن المخرج هو نفسه المؤلف، وبنلاحظ أن الأفلام اللي مؤلفها بيكون مخرجها بتكون أقوى لأن المخرج في الحالة دي بيكون عنده تصور شامل ووافي للفيلم لأنه كاتب القصة أيضًا. وده اللي حصل في حالة Collide.

القصة والسيناريو والحوار

سيناريو الفيلم بيبدأ بمشهد مطاردة سيارات عنيفة جدًا، وبينتهي بحادث بيصاب فيه بطل الفيلم (نيكولاس هولت) إصابة بالغة. ومن هنا بيبدأ بطل الفيلم (كايسي) إنه يحكي إزاي تطورت القصة علشان توصل للنقطة دي.

الأسلوب ده في كتابة السيناريو أسلوب مميز جدًا، لأنه بيخلي المشاهد في حالة من الترقب الشديد علشان يعرف ازاي الأمور وصلت للحظة دي. ومن ثم بيبدأ المشاهد في استكمال الأحداث من لحظة التوقف. والحقيقة أن Collide قدر يعيشنا في حالة من الترقب من أول لحظة لآخر لحظة.

أما عن الحوار في الفيلم فكان رائع، وبيقدم كتير من الحوارات الفلسفية العميقة، اللي لم نكن نتوقعها في فيلم أكشن المفروض يكون خفيف. لكن الحقيقة الحوار كان متميز جدًا، وخاصة الحوار المكتوب لأنتوني هوبكنز، واللي كان كل جملة بيقولها تقريبًا متميزة وفى محلها تمامًا.

الإخراج والتصوير

إخراج الفيلم كان متميز جدًا، ولعب على إثارة التشويق للحد الأقصى، أما عن إخراج مشاهد الأكشن فكان الفيلم متميز، وكان واضح الاستخدام الرائع للمؤثرات الخاصة لإضافة بعد فلسفي كان واضح في كتير من المشاهد، زي مشهد انقلاب السيارة في المطاردة الأخيرة في الفيلم، وغيرها من المشاهد اللي إخراجها أقل ما يوصف به أنها متميزة إلى إقصي درجة.

الموسيقي والديكور

ديكورات الفيلم كانت متميزة جدًا، والكاميرا كانت بتعمل كادرات رائعة، لكن بنعيب على الفيلم ضعف الموسيقى التصويرية، وحتي الديكورات على الرغم من تميزها كان المفروض تكون أفضل من كده. ونقدر نقول أن الموسيقى التصويرية والديكورات مش بنفس قوة القصة والإخراج وحركة الكاميرا.

الخلاصة

فيلم Collide واحد من أحسن أفلام الأكشن اللي شوفناها مؤخرًا، وبنوعدكم بقضاء حوالي ساعتين من التشويق المستمر والإثارة المتميزة.

علشان تبقي عارف:

تصنيف الفيلم في الولايات المتحدة PG13 لوجود بعض المشاهد الجنسية والشتائم ومشاهد المخدرات.