The Definitive Guide to Living in the Capital , Cairo , Egypt

نادرًا لما بنشوف فيلم خيال علمي مختلط بالكوميديا، وأكثر ندرة إننا نشوف النوعية دي من الأفلام بتنجح. علشان كده بنعتبر نجاح Colossal وإنه أعجبنا وأعجب المشاهدين نوع من أنواع هدايا القدر اللي مش بتتكرر كتير.

قصة Colossal

الفيلم بيحكي عن امرأة شابه بتعاني من حياة عاطفية متقلبة، وحياتها بشكل عام رتيبة ومتجهة بسرعة نحو الفشل المطلق، لكن وتزامنًا مع ظهور كائن غريب في كوريا الجنوبية بيتسبب في دمار هائل لمدينة سيول، بتكتشف بطلتنا أن عندها القدرة على التحكم في الوحش، وإن أي تصرف بتقوم بيه بيقوم بيه الوحش في نفس الوقت. ومن هنا بيكون لزامًا عليها أنها تحاول تكتشف سر اللي بيحصل، وتنقذ الوضع من التدهور.

فريق العمل

الفيلم من بطولة أن هاثواي، واللي قامت ببطولة الفيلم وهي حامل، مع مشاركة من دان ستيفنز وجيسون سوديكس، والفيلم من تأليف وإخراج ناتشو فيجالوندو.

السيناريو والحوار والإخراج

حوار الفيلم وقع عليه مسئولية الكوميديا في الفيلم، والحقيقه إنه قدر يقوم بيها كويس، لكن في المقابل بنعيب على الفيلم اننا لم نرى مشاهد كوميدية كتيرة بقدر ما سمعنا جمل حوارية كوميدية أكتر. أما الإخراج فعرف يوازن بين الكوميديا والفانتازيا وقدر يجذبنا كمشاهدين لمتابعة الفيلم من البداية للنهاية بدون إحساس بالملل.

الموسيقى والمؤثرات والديكورات

طبعًا المؤثرات الخاصة لعبت أهم أدوارها في الفيلم، والحقيقة أن المسئولين عنها قدروا يعملوا الموضوع ده بذكاء لأن الميزانية لم تسمح بعمل فيلم مثل (جودزيلا) مثلًا، وفى نفس الوقت كان لازم المشاهد يشعر أن هناك وحش بيدمر مدينة. وفى النهاية نجحت المؤثرات الخاصة بتضافر كبير من الموسيقى التصويرية والديكور علشان تنقل لنا قصة الفيلم كاملة في حدود الميزانية المتوسطة وفى نفس الوقت بدون إخلال بالمنطقية في الأحداث.

الخلاصة

فيلم Colossal مش أحسن فيلم خيال علمي فانتازي شوفناه في حياتنا، لكنه فيلم جيد يستحق المشاهدة.

علشان تبقى عارف: تقييم الفيلم على موقع IMDB 6.4 من 10.