The Definitive Guide to Living in the Capital , Cairo , Egypt

فكرة الاعتماد على التكنولوجيا الحديثة في أفلام الرعب اللي طالعة جديد فكرة تستحق الإعجاب بصراحة، وده لإنها بتدينا فكرة عن تطور تيمات الأفلام مع تطور المجتمعات والتقنيات الحديثة، وهو ده اللي لعب عليه فيلم Countdown. لكن السؤال بقى، هل نجح؟

فيلم Countdown بيحكي عن أبليكيشن أو برنامج بينزل على الموبايلات، فكرته هي تحديد تاريخ موت كل واحد من اللي بيستخدموه، ومع قرب الوقت بيزيد شعور كل واحد بإن فعلًا النهاية قربت وبيبدأ يحاول يهرب من مصيره المحتوم.

على الرغم من أن قصة الفيلم مبتكرة إلى حد ما، لكن الأداء التمثيلي من “إليزابيث ليل” و”جون بيشوب” و”جوردان كالواي” وباقي أبطال الفيلم كان ضعيف، بس الحقيقة نقدر نقول إن ده مش ذنبهم، إنما ذنب التأليف والإخراج اللي كان على إيد “جاستين ديك” واللي فشل تمامًا في إنه يضيف أي أبعاد إنسانية على الشخصيات، وبالتالي حسينا إن مفيش حاجة تربط ما بيننا وما بين الشخصيات اللي بنتفرج عليها على الشاشة علشان نتعاطف معاها كجزء مهم من أحداث أي فيلم.

الأسوأ من كده إن “جاستن ديك” حاول يدي الفيلم رشة كوميديا مع شوية تشويق، لكن في النهاية الخليط ده كان مش مقنع نهائي، ويمكن السر في ده يرجع للميزانية القليلة للفيلم، واللي غالبًا كانت السبب في إن (ديك) مقدرش يخلي الفيلم يطلع بالشكل اللي هو عاوزه.