The Definitive Guide to Living in the Capital , Cairo , Egypt

من المشهد الأول لفيلم Elize: Shadows of a Woman بنشوف جريمة قتل واحدة لزوجها، بالمباشرة دي وبالبساطة دي بيعرفنا صناع الفيلم إن الإثارة أحيانًا ملهاش علاقة بعدم معرفة المشاهد للقصة، لكن الإثارة كلها بتكمن في الإجابة على السؤال: ليه حصلت الجريمة؟ وإيه اللي حصل بعدها؟ وبالنسبة لنا، أكبر إثارة ممكن تحصل لنا هي لما نعرف إن أحداث الفيلم مبنية على قصة حقيقية، وجريمة هزت البرازيل لفترة طويلة، ولسه الناس بتتابع أي أخبار عنها لحد اليوم، لأن القاتلة لسه عايشة.

فيلم Elize: Shadows of a Woman بياخدنا في رحلة في حياة (إليز)، الشابة اللي بتعيش حياة مضطربة، وبتشتغل فتاة ليل، ومن خلال شغلها بتتعرف على (زبون) غني جدًا، وبيتعلق بيها لدرجة إنهم بيتجوزوا، وبتلاقي إليز من خلاله الفرصة اللي تقدر تبدأ من خلالها حياة جديدة نضيفة. لكن الأمور مش بتستمر بالمستوى ده من الإيجابية، وإلا مكانتش القصة استحقت تتحول لفيلم.

حياة إليز الجديدة مش بتفضل وردية على طول، مع الوقت بتكتشف إن جوزها بيخونها مع ستات تانية، اتعرف عليهم بنفس الطريقة اللي اتعرف بيها عليها أول مرة. ولما واجهته بخيانته ليها، فكرها بماضيها، وإنها ما تختلفش حاجة عن اللي بيتعرف عليهم، ومن هنا بتبدأ إليز تحس إن حياتها اتحولت لجحيم، وتبدأ تخطط لقتله.

صناع الفيلم قسموا الفيلم إلى ٤ فصول بشكل واضح، وكل فصل بيتكتب اسمه على الشاشة، في إشارة واضحة للأربع قطع اللي الزوجة قسمت جوزها ليها. تفصيلة صغيرة و(سوداوية) شوية، لكنها بتدينا انطباع إن صناع الفيلم مش عايزين يعملوا مجرد نسخة تمثيلية من الفيلم الوثائقي اللي تناول نفس الجريمة واتعرض على نتفليكس برضه، وكان عنوانه Elize Matsunaga: Once Upon a Crime، لكنهم عايزين يعملوا عمل قائم بذاته وله بصمة خاصة بيه.

الأداء التمثيلي لـ(لورينا كومبارتو) في دور (إليز) الزوجة كان هايل، وقدرت في لحظة معينة تحسسنا بالتعاطف مع واحدة المفروض إنها قاتلة. وده معيار مهم نقدر نقيس بيه قوة الأداء التمثيلي في أي عمل، وهو مدى قدرة الممثل على إنه يخلينا نتعاطف (أو ما نتعاطفش في أحيان تانية) مع الشخصية اللي بيقدمها.

لكن أمتع حاجة شوفناها في الفيلم هي الجوانب النفسية والإنسانية اللي فيه، يعني بنشوف إزاي (إليز) كانت بتعاني من سوء معاملة من أبوها، وشعورها المستمر بالخذلان وإنها ما تستحقش الحب، وكان من العوامل المهمة اللي خلقت شخصيتها الإجرامية بعد كده، ودي نقطة مهمة بيتم التركيز عليها دايمًا.

التشابه الكبير بين قضية إليز في البرازيل وقضية المحامية اللي قتلت والدتها بطريقة بشعة، واللي احتلت الترند في الأيام الأخيرة في مصر، بيورينا إن الجريمة مالهاش علاقة بمنطقة جغرافية أو زمن معين، الجريمة بتنشأ من مجموعة من العوامل، منها التربية، والحالة النفسية، والمشاكل اللي شافها الإنسان على مدار حياته، وحاجات تانية كتير بتخلي الشخص ممكن يتحول في لمح البصر من إنسان بريء إلى قاتل.

فيلم Elize: Shadows of a Woman، اللي احتل مرتبة متقدمة في الأعمال الأكثر مشاهدة على نتفليكس، يعتبر تجربة كويسة للناس اللي عايزة تتفرج على عمل مشوق من غير ملل، مع جرعة إثارة وعنف متوسطة، لكنه مش صالح للمشاهدة الأسرية أو للمشاهدين المحافظين.