The Definitive Guide to Living in the Capital , Cairo , Egypt

بعض أفلام الأكشن وحرب العصابات بتخرج عن كونها مجرد أفلام بتعرض مشاهد تبادل إطلاق النار ومشاهد القتال بين الأشخاص لأبعاد فلسفية أكبر وأوسع. هل فيه مخرجين متخصصين في النوع الغريب ده من الأفلام؟ طبعًا.. عندنا المخرج المميز (كوينتن ترانتينو) واللي بنعتبره واحد من (أجن) المخرجين في التاريخ. والنهارده بنتعامل مع تلميذ نجيب للسيد ترانتينو.. وده اللي هنستعرضه بالتفصيل في مراجعتنا لفيلم Free Fire.

القصة

فيلم Free Fire بيعتمد على نظام القصة البسيطة اللي بيخرج منها عدد ضخم من السيناريوهات والاحتمالات. الفيلم بيحكي عن مجموعة من المجرمين اللي بتجتمع في أحد المستودعات المهجورة علشان تعمل اتفاق إجرامي. لكن الأمور بتتطور لحرب وتبادل إطلاق للنار. وكل واحد من المجرمين بيحاول يخرج بدون ما يتعرض للقتل.

وزي ما قولنا على الرغم من بساطة القصة لكن البساطة دي مش معناها أن الفيلم تافه أو ضعيف أو حتى بيركز على الأكشن بس.

فريق العمل

فيلم Free fire من تأليف إمي جامب وبين ويتلي اللي بيتولى مسئولية الإخراج أيضًا، مع مشاركة  إنتاجية من المخرج الشهير مارتن سكورسيزي المشهور بسلسلة من الأفلام المهمة.

بطولة free fire بيقوم بيها  بري لارسون وسام رايلى وسيليان ميرفي وشارلتو كوبلي.

السيناريو والحوار والإخراج

سيناريو الفيلم كان مميز لأقصى درجة، وكان معتمد على فكرة وجود عدد معين من الأشخاص في مكان مغلق، وبذكاء يحسد عليه صناع الفيلم بنبدأ نستمر في متابعة الأحداث بدون ما نشعر بالممل أو الضيق على الرغم من أن الأحداث بتحصل في مكان واحد تقريبًا.

عدم شعورنا بالملل كان بيعني شيء واحد. تميز شديد للإخراج والحوار، وتمتعهم بذكاء شديد يجعل الوقت يمر علينا كمشاهدين بدون إحساس بالضيق.

الموسيقى والديكور

ديكورات الفيلم وأماكن التصوير اختيارها كان من أذكى ما يمكن. ولعبت الديكورات وزوايا التصوير وأسلوب حركة الكاميرا دور رائع في تعزيز قوة الفيلم. لكن الموسيقى لم تكن على المستوى المطلوب، وعلى الرغم من قوتها لكنها فشلت في أنها تسيب علامة بداخلنا. وكنا نتمنى تكون الموسيقى التصويرية أقوى من كده.

الخلاصة

فيلم Free Fire تجربة متميزة لكنه عاوز دماغ مختلفة. وبشكل عام لو كنت من محبي أفلام كوينتن ترانتينو هيعجبك الفيلم جدًا.

علشان تبقى عارف:

كان (لوك إيفانس) هو المُرشح الرئيسي لدور البطولة، لكنه اعتذر لانشغاله بأعمال أخرى.