The Definitive Guide to Living in the Capital , Cairo , Egypt

الحقيقة أننا لازم نعترف أن معلوماتنا عن إمارة موناكو محدودة للغاية، كانت كل معلوماتنا قبل مشاهدة الفيلم تنحصر فى ذكرى قديمة لما كنا بـ نسمع إذاعة مونت كارلو اللى بـ تبث من موناكو فى آواخر التسعينيات، الأمر اللى تطلب منا بعض القراءة عن تاريخ منطقة مجهولة من العالم، على الأقل بالنسبة لنا.

نيكول كيدمان بـ تجسد شخصية الفنانة جريس كيلى، اللى اشتهرت فى هوليوود فى فترة الثلاثينيات، ثم اعتزلت الفن بعد زواجها من أمير موناكو، على الرغم من الإشاعات القوية اللى طاردتها بشأن قيامها بدور فى فيلم من إخراج ألفريد هيتشكوك.

الفيلم اللى أخرجه أراش أميل بـ يحكي عن قصة سنة واحدة من حياة جريس كزوجة أمير وأم بـ تحاول طوال الوقت توازن بين حياتها كأميرة والمسئوليات القوية اللى بـ يلقيها عليها المنصب وبين حياتها الشخصية مع الأمير والأبناء، المهمة اللى تحولت لأمر شاق وصعب خصوصًا مع التحديات اللى واجهت موناكو أيامها لأن شار دى جول رئيس فرنسا -اللى كانت قوى عظمى أيامها- كان بـ يهدد باجتياح موناكو إذا لم تفرض ضرائب عالية على الأنشطة الاقتصادية عندها، لأن انعدام الضرائب فى موناكو شجع أصحاب المشروعات على إقامة مشاريعهم هناك بدلاً من فرنسا.

الفيلم بـ يأخذنا بهدوء وعمق لواحدة من أهدأ الإمارات فى العالم، المعلومات على الإنترنت بـ تقول أن موناكو دولة مدنية، بـ تستمد قوتها وحمايتها من الجارة الأكبر فرنسا، إلا أنها تعتبر بلد ذات سيادة منفصلة، ده على الأقل الوضع حاليًا، لكن الوضع أيام أحداث الفيلم كان ملىء بالاضطرابات والصراعات.

نيكول كيدمان قدرت تخرج بره شخصيتها المتمردة والجريئة بصفة عامة وتقدم شخصية هادئة ومتزنة، إلا أنها بـ تحمل خلف هدوءها روح من التمرد والتصرفات غير المعقولة واللى بـ تفكرنا بصورة كبيرة بتصرفات الأميرة ديانا قبل وفاتها الغامضة.

من الحاجات اللى لفتت انتباهنا وعجبتنا جدًا فى الفيلم، الكادرات الجميلة والمناظر الطبيعية اللى اهتم المخرج بإظهارها طوال الفيلم. بـ نشوف مشاهد طبيعية جميلة البطل الأساسى فيها مياه البحر والحياة الهادئة فى موناكو، كمان ديكورات القصر الملكي فى موناكو كانت أكثر من رائعة وعيشتنا فى الجو الملكى بقوة.

ضايقنا شوية حالة الملل اللى تسربت لنا خلال الأحداث، نقدر نقول أن السيناريو ما كانش متزن بدرجة كبيرة وكان بـ ييجي لنا إحساس باستعجال الأحداث فى كثير من الأحيان، ويمكن ده من مساوىء الفيلم اللى ممكن نغفرها مقابل أمور ثانية كويسة.

نقدر نقول أن فيلم Grace of Monaco مناسب كفيلم اجتماعى سياسى مع خيط رومانسى صغير، وبـ يضيف كثير لمعلوماتنا عن مكان يمكن كثير مننا ما يعرفش كثير عنه، ننصح بمشاهدته للناس اللى بالها طويل ومش عاوزة تشوف أكشن طوال الوقت.