-
أمريكا فيريراجاي باروشيل...
-
ثلاثي الأبعادعائلي...
-
دين دوبلوادين دوبلوا
-
في1 Cinema
Mohamed Hamdy
لو سألتونا عن أفضل شىء بـ يعجبنا فى أفلام الأنيميشن اللى بـ تقدمها هوليوود، هـ تكون إجابتنا بالتأكيد: التفاصيل! التفاصيل الصغيرة والدقيقة جدًا هى اللى ممكن تفرق فى استمتاعنا بأحداث أى فيلم أنيميشن، أما بالنسبة لعيون وعقول الأطفال، التفاصيل بـ تكون واحدة من أهم الأمور اللى عينهم دائمًا بـ تقع عليها وتراقبها، ويقدروا يكتشفوا عيوب السياق والسيناريو أسرع من أى مشاهد بالغ! ويمكن علشان كده هوليوود بـ تهتم بالتفاصيل فى أفلام الأنيميشن.
من إخراج دين ديبلوس وبطولة جاى باروتشيل وجيرارد باتلر وأمريكا فيريرا وآخرين، بـ نشوف مغامرة جديدة من مغامرات الثنائى المغامر المرح، بـ يتم استكمال الأحداث حيث انتهيت فى الجزء الأول وبـ ينطلقوا فى رحلة جديدة لاستكشاف أماكن وأراضى لم يكتشفها أحد من قبلهم، الأمر اللى بـ يقودهم لاكتشاف مجموعة تنين جديدة، فى كهف من الجليد، وبـ يلاقى “هيكوب” والتنين الخاص به نفسهم فى معركة قوية مش عاوزين نحرق عليكم تفاصيلها أكثر من كده.
من أهم العناصر اللى جذبت انتباهنا للفيلم عنصر الإبهار المتمثل فى الإخراج المتطور للرسوم المتحركة المولدة باستخدام الكمبيوتر، والعرض بتقنية ثلاثية الأبعاد أعطت للفيلم روح وسطية ما بين الأفلام العادية وأفلام الأنيميشن، الأسلوب ده من الإخراج الكارتونى بـ يحقق عنصر الإبهار وبـ يشتغل على نقطة التفاصيل فى نفس الوقت، الأمر اللى بـ يسبب للمشاهد متعة مزدوجة، وبـ يحسسنا أن كل مشهد فيه نوع من الانسيابية المريحة.
عنصر التحريك كان البطل بعد عنصر الإبهار مباشرة، التحريك كان مذهل ومتناسق وتقريبًا مافيهوش غلطة، وظهر بشدة دور تقنيات الكمبيوتر الحديثة فى إضافة بُعد إنسانى حقيقي على عملية التحريك.
على الرغم من برودة الأداء الصوتى للأبطال فى بعض المشاهد، ويمكن ده أحد عيوب الفيلم بالنسبة لنا، إحساسنا فى كثير من الأوقات بعدم جودة الأداء الصوتى للأبطال، إلا أن بعض المشاهد الأخرى وخصوصًا المشاهد التراجيدية كان الأداء الصوتى فيها بـ يرتفع جودته وإتقانه لمستوى متميز، كمان الموسيقى التصويرية ساعدت على وصول مشاعر الأبطال لنا على طول الخط الدرامى للأحداث، وقدرت أنها تداوى أى عيوب فى أداء الأبطال وخصوصًا جاى باروتشيل.
الجزء الثانى من How to train your Dragon واللى نتوقع له نجاح كبير زى الجزء الأول من نفس السلسلة، النجاح اللى توقعه القائمين على الفيلم وأعلنوا أنهم بصدد إنتاج جزء ثالث وأخير لتكملة باقى أحداث الثلاثية اللى بـ نتوقع لها نجاح باهر، فقط لو تقدر تبعد عن فخ التكرار وتحاول تقدم شىء جديد فى كل جزء بـ يتم إنتاجه، وإلا هـ تتحول زى أى سلسلة أفلام لشىء باهت بـ يتم تقديمه فقط لجني الأرباح.