The Definitive Guide to Living in the Capital , Cairo , Egypt

قولناها قبل كده وبـ نقولها ثاني وثالث.. على الرغم من الانفتاح والإباحية اللى بـ تظهر بهم هوليوود، إلا أنها من الداخل بـ تنتمي وتنتصر لبعض القيم الثابتة، ومن بينها بعض الأفكار الدينية زي الانتصار للدين.. بمعنى أن الشخص الملحد في الفيلم لازم يرجع للدين من جديد، والعالم المتشكك في صحة الدين وبـ يقيس كل حاجة بمقياس العلم لازم يحصل له حاجة في سياق الأحداث تخليه يفوق ثاني ويفتكر سيطرة الدين على مقاليد الأمور.

أما النقطة الأكثر سيطرة وظهور في بعض أفلام الرعب، هي تخويف المراهقات من مشاكل ممارسة الجنس في فترة الدراسة الثانوية، ولأن هوليوود ذكية بـ تقدر تمرر الرسائل دي من خلال أفلامها بدون شعور الغالبية العظمى من مشاهدي الأفلام، ومنها الفيلم اللى بـ نتكلم عنه النهارده.

من تأليف وإخراج دافيد روبرت ميتشل بـ نشوف قصة بنت مراهقة بـ تتورط في علاقة جنسية مع أحد الشباب في بداية معرفتهم ببعض، بعد كده بـ تكتشف أن الشاب ده مارس معاها الجنس علشان ينقل لها شبح بـ يتتبع الناس ويؤذيهم، ولا سبيل للخلاص منه سوى بممارسة الجنس مع شخص آخر ونقل الشبح له!

طبعًا واضح جدًا أن الفكرة مقتبسة من الأمراض اللى بـ تنتقل بالاتصال الجنسي زي الأيدز والسيلان وغيرها، لكن مع بعض الحبكة الهوليوودية ومشاهد الشبح اللى كان بـ يظهر بشكل مخيف جدًا وبـ يتحرك بخطوات بطيئة لكنها كانت قادرة على بث الرعب في نفوس معظم مشاهدي الفيلم في السينما.

الموسيقى التصويرية كانت أحلى حاجة حصلت في الفيلم.. موسيقى هادية ومكونة من جمل لحنية صغيرة بالبيانو أو بالآلات الوترية.. وكانت بـ تصيبنا بالتوتر في بعض المشاهد وبالحماسة في مشاهد أخرى، أو حتى بالخوف والاكتئاب في كثير من المواقف اللى بـ تحصل في الفيلم.. الموسيقى كانت مضبوطة بالمللى ومن أهم الحاجات اللى لفتت نظرنا في الأحداث.

الأداء التمثيلي للأبطال كير جيلكريست، لورين باس، وباقي الأبطال كان في المستوى المتوسط المقبول والمتوقع من مجموعة من الممثلين اللى بـ يقوموا بدور مجموعة من الشباب المراهق اللى بـ يهربوا من شبح بـ يحاول يقتل صديقتهم القريبة منهم.

الفيلم بـ يقدم رعب مختلف وبأسلوب هادي ومتميز مع موسيقى رائعة، كان ممكن يقترب أكثر ويحصل على 5 من 5 في تقييمنا لولا الرسالة الدينية والأخلاقية الواضحة أكثر من اللازم.