The Definitive Guide to Living in the Capital , Cairo , Egypt

من وقت للتاني بنحتاج نتفرج على أفلام من ثقافات مختلفة، لكن للأسف التوزيع الخاص بالأفلام بيركز في المقام الأول على توزيع ونشر الأفلام الهوليوودية، وعلى فترات بنشوف فيلم فرنسي أو روسي أو إيطالي. والحقيقة بنكتشف أن هناك عالم كامل من الأفلام الجميلة، وإحنا بنبص عليه من خُرم الباب فقط!

القصة

الفيلم بيحكي عن جزيرة كيكوريكي، واللي بيعيش فيها مجموعة من المخلوقات الغريبة والعجيبة، وفيهم مخترع مجنون بيقدر يخترع جهاز ينقل شخصية وصفات أي كائن لكائن أخر، لكن لما بيقرر أحد الشخصيات إنه يجرب الجهاز على نفسه، بيكتشف أنه بينقل الأجساد كلها مش بس الشخصيات، وده بيفتح كمية من المغامرات اللي مش بتنتهي إلا مع نهاية الفيلم.

فريق العمل

الفيلم من بطولة سيرجي ماردار وفاديم بوسحانوف وجاريك خارلاموف وميكائيل شيرنايك، أما الإخراج فمن نصيب دينيس كيرنوف، والتأليف لديميتري ياكوفينكو بالاشتراك مع دينيس كيرنوف.

السيناريو والحوار

سيناريو الفيلم كان محكم وقوي، وقادر على إضحاكنا وفي نفس الوقت أقناعنا بكل الفانتازيا اللي بتدور على مدى حوالي ساعتين هم عمر الفيلم، أما الكوميديا الحقيقية فكانت في الحوار الضاحك والجميل واللي بتحتوي كل جملة فيه تقريبًا على قفشه ضاحكة أو تمهيد لموقف كوميدي.

الإخراج والموسيقى والتحريك

الإخراج اعتمد على فكرة الكوميديا القائمة على المواقف الكوميدية والإيفيهات الساخرة في نفس الوقت، لكن في نفس الوقت اعتمد على تكنيك تحريك مختلف وجميل وجذاب للعين، واهتمت الديكورات بإظهار التنوع في الألوان من خلال كوكتيل ألوان جميل كان جذاب جدًا للعين. وكل الأمور دي جعلت تقييمنا للفيلم عالي ومعدل انتظارنا لكل مشهد من مشاهد الفيلم أكتر من اللي قبله.

الخلاصة

تحية للمبادرات المهمة زي سينما زاوية ونوادي السينما المستقلة اللي بتحاول دايمًا تعرفنا على ثقافات مختلفة، وإحنا بالفعل محتاجين نتفرج على أفلام غير أمريكية علشان نعرف إن السينما عالم متكامل بيعبر عن ثقافات كتير.

علشان تبقى عارف:

تصنيف الفيلم PG يعني صالح لمشاهدة جميع أفراد الأسرة مع بعض المراقبة من الأهل للأطفال أثناء المشاهدة.