-
آل باتشينوأليس إيف...
-
دراما
-
شينتارو شيموساواشينتارو شيموساوا
-
في1 Cinema
Mohamed Hamdy
لما نشوف فيلم أكشن وجريمة وإثارة ويكون من بطولة آل باتشينو وأنتوني هوبكنز، وكل واحد فيهم يعتبر علم من أعلام التمثيل فى هوليوود، بنتوقع مباراة تمثيلية عالية القيمة، وبنتوقع فيلم ينافس على أفضل الجوائز، ونتوقع مستوى أداء وتمثيل وإخراج وديكور أعلى ألف مرة من النتيجة النهائية الغريبة اللى شوفناها على الشاشة!
من تأليف أدم ماسون وإخراج شينتارو شيموساوا وبطولة آل باتشينو وأنتوني هوبكنز ومالين أكريمان وأليس إيفي بنشوف فيلم بينتمي لفئة الجريمة والإثارة، عن قصة صاحب شركة أدوية بتتوجه له اتهامات كتيرة بالفساد واستغلال منصبه لتحقيق أرباح بأشكال غير مشروعة، بتتعرض حبيبته للخطف، وبيضطر أنه يستأجر فريق تحقيق خاص لمحاولة إيجادها، وفى نفس الوقت بيحاول يتصرف بنفسه مع الخاطفين ويوصل لحل سريع.
الحقيقة أن الفيلم فيه أكتر من Twist وبنكتشف مع الوقت حاجات كتير لها علاقة بعملية الخطف والبنت المخطوفة نفسها لكن إحنا مش عاوزين نكشف الأحداث، كل اللى نقدر نقوله أن المشاهدين لازم يتوقعوا أي شىء ممكن يحصل فى أي وقت، وأن الفيلم محتاج تركيز شديد فى أحداثه وتفاصيله علشان يقدر المشاهدين يفهموه ويتابعوه بشكل سليم.
الأداء التمثيلي للأبطال كان ضعيف شوية، مقارنة بالأسماء الكبيرة فى الفيلم واللى كنا نتوقعه منها، كمان الفيلم على صعيد السيناريو كان ممل جدًا وحسينا بتطويل شديد خاصة فى النصف الأول، كمان أخد الفيلم وقت طويل علشان يبدأ يكشف حقيقة أحداثه، فى الوقت ده ومن فرط الغموض حسينا أحيانًا بالملل من بطء الأحداث.
مشاكل الفيلم بترجع فى المقام الأول للإخراج ويمكن ده علشان أول إخراج للمنتج والكاتب شينتارو شيموساوا واللى أخد فرصة نعتقد أنها أكبر منه فى التعامل مع أسماء كبيرة ومهمة زي أبطال الفيلم.
Misconduct فيلم غموض وإثارة.. ما حسيناش معاه بكتير من الإثارة وحسينا بملل من فرط الغموض.. ننصحكم تشوفوه فى الفضائيات مش فى السينما.. مع كتير من التركيز وقليل من المسليات!