The Definitive Guide to Living in the Capital , Cairo , Egypt

عندك حلم؟ عندك رؤية ووجهة نظر؟ قلبك حاسس إن سكة معينة هي الصح لك وللناس اللى بتحبهم؟ فيلم Moana باختصار هو هيقول لك كل اللي أنت محتاجه علشان تبدأ رحلتك الشخصية علشان تصنع أسطورتك الذاتية، وعلشان تبقى إنسان عظيم وتتبع حلمك وهدفك… مهما حاول اللي حواليك يقولوا لك أنك غلط.. ومهما بانت السكة طويلة والمجهود كبير.

موانا هو اسم  البطلة الرئيسية لأحداث فيلمنا اللي بيحكي عن قصة موانا، ابنة زعيم قبيلة عايشة في جزيرة هادية وسكانها ودودين ومسالمين.

كل شيء بيتم ببساطة وسهولة، إلى أن تقرر موانا لما تكبر في السن أنها تتجه للبحر وتبحث عن بطل أسطورى قادر على عمل أشياء عظيمة علشان تقدر تنقذ أهل جزيرتها من مستقبل مظلم بعد بداية الطبيعة في إظهار غضبها ضد أهل الجزيرة السالمة.

الأداء الصوتي لفيلم Moana لـ أولي كارافالو، دواين جونسون، آلان توديك، مع ريتشيل هاوس وجيمني كليمنت وتيمويرا موريسون، والفيلم من تأليف وإخراج رون كليمنتس، واللي قدر يوجه الفنانين اللي شغالين معاه في الفيلم علشان يطوعوا قدراتهم الصوتية لخدمة أدوارهم، بشكل قدم الشخصيات بشكل متميز جدًا، وأعطي للشخصيات المرسومة على الورق أمامنا روح وبعد جديد ومتميز.

نتكلم بقى عن الدقة المتناهية والرائعة في تصميم الشخصيات.. بداية من ملابسها ونهاية بحركتها على الشاشة، مرورًا بتصميم الشخصيات والاهتمام بكل جزئية فيها بشكل متميز ورائع، كمان تحريك الشخصيات على الشاشة كان بيتميز طوال الوقت بالإنسيابية والقدرة على الإقناع وراحة عين المشاهدين، بالإضافة إلى تناسق الألوان سواء بالنسبة للشخصيات أوالديكورات وباقي عناصر الفيلم.

الفيلم بيحمل كتير من الرسائل السياسية والفلسفية وممكن يتم تفسير كتير من مشاهده وجمله الحوارية بأكثر من وجهة نظر، وده بيخلي متعة المشاهدة أكبر وبيخلي الفيلم مناسب لقطاعات أوسع عمريًا من المشاهدين، ونقدر نقول بضمير مستريح أن الفيلم تجربة بصرية وعقلية ممتعة للكبار والصغار على حد سواء،  بل ممكن نذهب لأبعد من كده ونقول أن الفيلم تجربة متميزة للكبار بالذات علشان هيقدروا يفهموا كتير من جوانب الفيلم بعيدًا عن اهتمام الصغار بالصورة الجذابة والقصة المباشرة فقط.

فيلم Moana اللي أنتجته شركة ديزني، واحد من أحسن أفلام  الأنيميشن اللي شوفناها في 2016 ونتمنى ينافس بقوة في مباراة الأوسكار اللي قربت.

علشان تبقى عارف:

أعلنت شركة (ديزني) في ديسمبر 2014 عن رغبتها في تقدم مترشحات لأداء دور (موانا)، وبالفعل تقدمت آلاف الفتيات لأداء الدور.

الفيلم يعتبر ثاني أفلام ديزني في عام 2016 بعد Zootopia.