The Definitive Guide to Living in the Capital , Cairo , Egypt

البورصة، ترابيزة القمار الممتدة على اتساع العالم، اللون الأخضر المحبب للسهم المرتفع الرابح واللون الأحمر الكريه المُعبر عن السهم الخاسر، مليارات الدولارات بتنتقل من مكان للتاني في ثواني  معدودة، ثروات بتتعمل وثروات تانية بتضيع في دقايق محدودة، هو ده العالم اللي بيحكي عنه فيلم Money Monster… على الأقل في النصف الأول من الأحداث!

الفيلم من إخراج جودي فوستر، وبطولة جورج كلوني وجوليا روبرتس، بنشوف قصة مقدم برنامج اقتصادي عن تحليل أسهم البورصة اسمه  Money Monsterمقدم البرنامج (جورج كلوني) بيتم أخذه كرهينة في الأستوديو على الهواء مباشرة، واللي بيخطفه واحد خسر أمواله في البورصة بناء على نصائح كلوني الغير سليمة، بنعرف بعد كده أن الموضوع له أبعاد أكبر بكتير من كده، بس دي أحداث مش عاوزين نحرقها عليكم قبل مشاهدة الفيلم.

جوليا روبرتس بتلعب دور مخرجة البرنامج واللي بتجد نفسها في موقف لا تحسد عليه، بين عدم قدرتها على إيقاف البث على الهواء، وبين محاولتها إنقاذ مقدم البرنامج من القتل، من خلال الاستجابة لطلبات المُختطف، ونقدر نقول أن أداء الثلاثي جورج كلوني وجوليا روبرتس وجاك أوكونيل كان متميز، خاصة كلوني واللي ظهر بشكل مختلف عن باقي أعماله اللي شوفناها له قبل كده.

ذكاء القائمين على الفيلم تمثل في بساطة الديكور اللي تم تصوير الفيلم فيه، الديكور في 98% من الأحداث كان ديكور البرنامج اللي بتحصل فيه حادثة الإختطاف، و2% لبعض مشاهد التصوير الخارجية، ودي نقطة إنتاجية ذكية جعلت الفيلم يتكلف ميزانية قليلة.

بنعيب على الفيلم ضعف الموسيقى التصويرية وعدم قدرتها على الانسجام مع الأحداث، كمان الربع الأخير من الأحداث حسينا فيه بتطويل وعدم منطقية في السيناريو، وبدأ شبح المبالغة يتسرب لأحداث الفيلم اللي كانت منطقية تمامًا في البداية.

Money Monster  فيلم ظريف وخفيف بيتناول أمور اقتصادية بتأثر على حياتنا اليومية بطريقة ذكية ومُختلفة، وبعيدًا عن تعقيد بعض الأفلام التانية، زي The Big Short واللي كان معقد وغير مفهوم في جانب كبير منه، لكن في نفس الوقت ما نقدرش نقول أن الفيلم ممتع زي The Wolf Of Wall Street على سبيل المثال.