The Definitive Guide to Living in the Capital , Cairo , Egypt

هواية تربية الحيوانات الأليفة هواية معروفة ومفهومة.. ناس كتير بتحب يكون عندها كلب صغير أو قطة جميلة أو حتى حوض سمك. لكن فكرة أن يبقى عندك حيوان رخوي غير معروف شبه كلب البحر، وأنك تربيه داخل محرك سيارتك، كل دي أمور مش بنشوفها غير في السينما، في عالم الخيال، وتحديدًا في فيلم Monster Trucks اللي عرضته السينمات المصرية مؤخرًا وتحديدًا مع بداية موسم أجازة نصف السنة.

فيلم Monster Trucks من إخراج كريس ويدج، وتأليف جلين بيرجر، ومن بطولة لوكاس تيل وجان ليفي، مع روب لوي وإيمي ريان.

الفيلم بيبدأ بمشاهد افتتاحية لعملية تنقيب عن النفط بتتحول لمشكلة كبيرة، لما بيواجه القائمين على عملية التنقيب منطقة مجوفة تحت الأرض فيها مياه ومظاهر حياة، لكن الجشع وحب الحصول على البترول بيجعلهم يتجاهلوا فكرة وجود حياة تحت الأرض ويخترقوا المنطقة بأدواتهم، الأمر اللي بينتج عنه حادثة كبيرة بتتحول لحديث الصحافة والإعلام اللي بتحاول المؤسسة المنقبة عن البترول إبعادهم بأي شكل علشان تقدر تاخد النفط الموجود في المنطقة.

بعيدًا عن كل الأحداث دي بنبدأ نتعرف على بطلنا  تريب اللي بيقوم بدوره لوكاس تيل، واللي بيحاول يجمع سيارة أحلامه من خلال بقايا السيارات الأخرى، بحكم عمله في منطقة التخلص من السيارات الخردة، لكن الصدفة وحدها بتسوق إليه الكائن الخرافي اللي هرب من موقف التنقيب عن النفط، واللي بيستخبى في الجراج الخاص به.

العلاقة بين الكائن العجيب وبين تريب بتبدأ بسوء فهم كبير، ثم بتتحول لما يشبه الصداقة لما يستبدله تريب بمحرك سيارته، وتبدأ حالة من المطاردة بين شركة النفط اللي عاوزة تقتل الكائن ده وبين تريب اللي بيحاول يحافظ على حياته وحياة الكائن الغريب اللي أصبح فجأة في عهدته.

الفيلم بيقدم مجموعة من المشاهد القوية واللي مثلت أختبار حقيقي للمؤثرات الخاصة والخدع السينمائية، زي مشاهد المطاردة بالسيارة، أو مشهد سباحة الكائن الغريب في النهر على سبيل المثال، وكلها كانت مشاهد صعبة لكن تم تأديتها بذكاء وبتوظيف متميز للمؤثرات الخاصة، يحسب للقائمين على الفيلم.

معلومة على الطاير: تقييم الفيلم على موقع IMDB كان 5.5 من 10 وعلى موقع rotten tomatoes كان 56%

أما الأمور اللي بنعتبر القائمين على الفيلم فشلوا فيها فكانت عناصر الديكور والموسيقى وحتى زوايا التصوير وصناعة الكادرات… ويمكن كل العناصر دي تكون مش مهمة جدًا لما يتعلق الأمر بفيلم مغامرات موجه بالمقام الأول للمراهقين، لكن برضه هي عناصر لا يمكن إغفالها تمامًا ولازم نتكلم عنها في مجمل كلامنا عن أحداث الفيلم.

فيلم Monster Trucks   في رأينا بيقدم مغامرة لا بأس بها لمدة حوالي ساعتين، وبنعتقد أنه بيخاطب فئات عمرية بتهتم بالمغامرة والحركة أكثر من أي شيء أخر، علشان كده من حظهم الكويس أنه تم طرح الفيلم في موسم أجازة نصف السنة، وهو موسم ممتاز للباحثين عن النوعية دي من الأفلام.

علشان تبقى عارف: الفيلم يعتبر أول فيلم حقيقي (مش رسوم متحركة) للمخرج كريس ويدج.