The Definitive Guide to Living in the Capital , Cairo , Egypt

بعض الأفلام بـ نحس أن منتجيها بـ يكتفوا بوضع اسم ضخم زي جوني ديب على الغلاف، ويسيبوا السنارة تصطاد المشاهدين بدون الاهتمام بأى تفاصيل أخرى خاصة بالفيلم، ده باختصار رأينا عن Mortdecai، الفيلم اللى اكتفى صانعيه باسم البطل، وتركونا لفيلم مكرر وغير هادف وخرجنا منه كما دخلناه… أو أسوأ.

من تأليف إريك أورنسون وإخراج ديفيد كويب وبطولة جوني ديب وجونيث بالترو وأوليفيا مان وإيوان ماكريجور بـ نشوف قصة صائد وبائع تحف مفلس هو السيد موردخاي الواقع فى الديون، واللى بـ يسعى لعقد صفقة أخيرة مليئة بالتعقيدات، والخاصة بلوحة أثرية بـ تحتوي على أرقام حساب فى أحد بنوك سويسرا، مُخرن فيه كمية ضخمة من الذهب المُهرب من أيام الحرب العالمية الثانية، الأمر اللى بـ يقود لمجموعة من المواقف "المفروض" أنها كوميدية، لكن ريحة الكوميديا نفسها ما شوفناهاش فى الفيلم، أو حتى أى شىء قريب من الكوميديا بحال من الأحوال!

الفيلم بـ يعتمد على تيمة واحدة هى: موردخاي يقع فى مشكلة.. بعض المفارقات الكوميدية.. صديق موردخاي ينقذه.. موردخاي يحاول إغواء زوجته.. موردخاي يقع فى مشكلة.. مفارقات كوميدية.. صديقه ينقذه.. يحاول إغواء… إلخ… إلخ.

طوال فترة مشاهدتنا للفيلم كنا بـ نتفرج على أمل نشوف أى تغيير فى السيناريو، لكن دي كانت الحقيقة، مع بعض الرتوش الجانبية غير المفيدة أو المهمة، قد نكون ابتسمنا مرة أو اثنين، لكن الغيظ والإحساس بالمهانة سيطروا علينا لبقية الفيلم!

قد يكون الفيلم مضحك للناس اللى بـ تحب الأفلام اللى بـ تتكلم على اختلاف الثقافات بين البريطانيين والأمريكيين، الأمر اللى بـ يظهر بشدة لما بـ يسافر موردخاي (الإنجليزي العتيق) للولايات المتحدة، وبـ يشوف نمط الحياة المختلفة هناك، لكن بـ تظل منطقة الدعابة مقصورة على عينة محددة من الجماهير اللى ممكن يكونوا قليلين فى مصر، وعلى الرغم من فهمنا لأسلوب الدعابة ده، إلا أننا ما ضحكناش برضه.

الديكورات والموسيقى التصويرية كانت بنفس جودة الفيلم، عادية ومافيهاش جديد، قد تكون بعض المؤثرات الخاصة بـ تنقل موردخاي من بلد لبلد وإظهار الانتقال على الشاشة من خلال طائرة بـ تطير بين أسماء البلاد، قد يكون ده تأثير كويس، لكن بالنسبة لحجم الفيلم ومستوى الإنفاق عليه بـ نعتبر دي ميزة بسيطة ولا تستحق السرد، لكننا بـ نحاول نعثر للفيلم على أى حسنة ومش لاقيين!

المشاهد الجنسية فى الفيلم محذوفة بفعل الرقابة المصرية، بالتالى نعتقد أن الشباب من سن 16 سنة ممكن يشاهدوا الفيلم، على الرغم من تصنيفه فى الولايات المتحدة كفيلم من النوعية R لـ(Some Language and Sexual Material)  لكننا ما شعرناش بحذف العديد من المشاهد من الفيلم.

الشىء الوحيد اللى ممكن يدفعكم كمشاهدين لدخول Mortdecai هو العشق الشديد لجوني ديب، أى شىء آخر غير الدافع ده ننصحكم ساعتها تشاهدوا فيلم ثاني توفيرًا للفلوس والوقت.