The Definitive Guide to Living in the Capital , Cairo , Egypt

إيه اللى ممكن يحسس المشاهد بالإثارة أكثر من فيلم عن سباق السيارات بالإضافة لرغبة فى الانتقام بـ تتملك بطل الفيلم؟ طوال الوقت بـ نعرف أن تيمة الانتقام واحدة من أنجح وأقوى التيمات اللى تقدر تشد المشاهد من اللحظة الأولى، الجديد المرة دى أن الانتقام بـ يتم من خلال حلبات سباقات السيارات فى الشوارع.

من تأليف جورج جاتانس وجون جاتنز وإخراج سكوت وو بـ نشوف أرون بول فى دور طوبى مارشال اللى بـ يدخل السجن ظلم وبـ يخرج منه وهو بـ يدور على الانتقام بأى شكل ممكن، الانتقام اللى بـ يدخله ويدخلنا فى سلسلة طويلة غير منتهية من السباقات اللى تم تنفيذها على أعلى درجة من الإثارة والتشويق الممكن.

زى ما قولنا تيمة الانتقام اللى تم تطعيم الفيلم بها بـ تحط المشاهد فى حالة من الإثارة والتعاطف مع البطل من اللحظة الأولى، وكان واضح من صناع الفيلم أنهم عارفين أن جمهورهم من الشباب المهتم بسباقات السيارات، الشباب اللى بـ يقضى وقت طويل فى لعب الفيديو جيم اللى بـ تحمل نفس الاسم واللى حققت نجاح لا يقل عن نجاح سلسلة الأفلام بل ممكن يكون تخطاها فى كثير من الأحيان، نقدر نقول أن اللعبة والفيلم كلاهما بـ يخدم الآخر وبـ يزود من نسبة المشاهدة بالنسبة للفيلم والتحميل والشراء بالنسبة للعبة.

المؤثرات الخاصة والخدع السينمائية، وفرق تنفيذ المطاردات وتحطيم السيارات ومشاهد الأكشن لعبت دورها على أفضل وجه ممكن، بـ نشوف كثير من مشاهد حبس الأنفاس خلال الفيلم، ولعل أفضلهم مشهد حمل الطائرة لسيارة السباق بعد طيرانها من على قمة هضبة عملاقة، واللى تم استعمالها فى الإعلان الدعائى للفيلم وغيرها من المشاهد المثيرة.

يعيب الفيلم أن تركيزه على مشاهد الأكشن خلاه يخسر كثير على صعيد الدراما والقصة، لكن بشكل عام نقدر نقول أن الفيلم كان عارف أن جمهوره داخل الفيلم بحثًا عن مشاهد السباق ولا شىء غيرها، وده اللى قدر يقدمه صناع الفيلم باحترافية.

الموسيقى التصويرية كانت من العوامل الأساسية لنجاح الفيلم، موسيقى بـ تنقل جو الأكشن وبـ تضع المشاهد فى الأحداث من البداية للنهاية بشكل متوازن وقوى، بالإضافة لاختيار أماكن التصوير الخارجية وأماكن السباقات اللى تميزت بالتنوع والقوة بين عدة بيئات مختلفة.

Need For Speed فى نسخته الجديدة بـ يقدم جرعة من الإثارة والأكشن تستحق المشاهدة، يعيبها ضعف الخيط الدرامى اللى بـ يربط مشاهد الأكشن، ننصحكم بالمشاهدة لو كنتم من محبى سباقات السيارات بأنواعها.