The Definitive Guide to Living in the Capital , Cairo , Egypt

مين فينا ما فكرش في أحد الأيام في فكرة الخلود؟ فكرة القدرة على قهر الموت والحياة إلى الأبد؟ على الرغم من استحالة الفكرة وتناولها في أكثر من فيلم، إلا أن Self/less قدر يقرب لنا الصورة بعض الشىء، ويأخذنا في رحلة فانتازية إلى عالم الخلود.. لكن هل الخلود فعلًا فكرة كويسة زي ما كنا بـ نتصور؟ هو ده السؤال اللى بـ يحاول الفيلم يرد عليه طوال الوقت.

من إخراج تارسيم سينغ وتأليف أليكس وديفيد باستور بـ نشوف قصة ملياردير عجوز (بن كنجسلي) بـ يعاني من مرض السرطان وبـ يحتضر في أيامه الأخيرة، إلى أن يتلقى عرض من شركة أو مؤسسة مجهولة بـ تدعوه فيها لفرصة جديدة للبقاء على قيد الحياة من خلال نقل روحه إلى جسد آخر! طبعًا كلنا عارفين أنه هـ يقبل في النهاية بعد فترة من التردد، ومن هنا بـ تبدأ الأحداث الحقيقية لما بـ يكتشف أنه في مقابل انتقاله لجسد آخر لازم يكون فيه متبرع بالجسد ده.. ومن هنا بـ يبدأ يراود بطلنا الجديد (ريان رينولدز) ذكريات عن حياته السابقة، الأمر اللى بـ يقوده لاكتشافات مذهلة مش عاوزين نحرقها عليكم.

الأداء التمثيلي للأبطال كان قوي ومتميز.. بن كنجسلي على الرغم من صغر مساحة دوره إلا أنه قدر يؤديه بشكل قوي وعظيم، ريان رينولدز كمان أدى دور مهم فيما يتعلق بالأكشن وإعطائنا الإيحاء بالتحول من رجل عجوز لشاب صغير في السن، لكن كان من المفترض أن يكون فيه رابط تمثيلي بين البطلين اللى بـ يؤدوا نفس الشخصية، بحيث نشعر أنهم نفس الشخص لكن في جسدين مختلفين، لكن للأسف فات الإخراج -عن عمد أو غير عمد- تقديم الرابط ده والاكتفاء بإظهار الشخصيات كل على حدة.

على الصعيد التمثيلي برضه دور مادلين أو ناتالي مارتينز ما كانش بالقوة اللى كنا نتوقعها، ونعتقد أن وجودها في الفيلم كان لمجرد توفير بطولة نسائية كعادة معظم الأفلام، مع أن دورها كزوجة للبطل الشاب كان ممكن يخرج منه كثير من الانفعالات واللحظات التراجيدية، لكن إخلاص الفيلم في النهاية كان للحركة والغموض والإثارة.

الموسيقى التصويرية لعبت دور مهم في الأحداث خاصة بداية استكشاف داميان الشاب لجسده الجديد ولقدراته، وقدرت تلخص كثير من المشاهد وتقدم لنا كثير من الانفعالات بشكل متميز وراقي، لكن الديكورات ما كانتش على نفس القدر من المسئولية على الرغم من المشاهد الافتتاحية اللى قدمت لنا فيها مشاهد قوية.

Self/Less مش أفضل فيلم عن الخلود والانتقال من جسد لآخر.. لكنه فيلم يستحق المشاهدة بدون انطباعات أكثر من اللى قولنا عليها في المقال النقدي.