The Definitive Guide to Living in the Capital , Cairo , Egypt

أفلام رعب كتيرة تناولت فكرة الكيان الشيطاني اللي بيتم استدعاؤه بمجرد ذكر اسمه.. الفكرة نفسها حاضرة في التفكير الجمعي لكل سكان كوكب الأرض تقريبًا مع اختلاف حالتهم المادية والأجتماعية، ويمكن ده واضح بشدة لما الناس بتتكلم عن الأمراض الخطيرة زي السرطان مثلًا وتسميها (المرض الوحش) أو تتكلم عن الجن وتسميه (بسم الله الرحمن الرحيم)… وهكذا.

فيلم The bye bye man من أخراج ستايسي تايتل، وسيناريو وحوار جوناثان بينر، ومن بطولة  كاري آن موس، جينا كانيل، مع ماريسا إيشيفريا.

الفيلم بيحكي عن مجموعة من طلبة الجامعة، واللي بيحرروا عن طريق الخطأ كيان شيطاني مرعب بيتسبب في قلب حياتهم رأسًا على عقب، الأمر اللي بيدعوهم للاتحاد مع بعض من جديد علشان يقدروا يتغلبوا عليه، خاصة أنه بيتم استدعاؤه بمجرد ذكر اسمه!

زي ما قولنا فكرة الفيلم مكررة وغير جديدة وهو شيء أصبح محفوظ في كل أفلام الرعب تقريبًا، لكن قوة الفيلم كانت في المؤثرات البصرية والصوتية اللي فيه.. على الرغم من اعتماد الفيلم في المقام الأول على المشاهد المفاجئة والأصوات العالية اللي بتظهر بعد مشاهد طويلة من الصمت وهو أسلوب قديم في الرعب لكن تم تقديمه بشكل متميز وجديد وبطريقة تسبب الخوف فعلًا، ودي يمكن كانت نقطة القوة الوحيدة في أحداث الفيلم.

معلومة على الطاير: الفيلم حقق 13 مليون دولار أرباح في اليوم الأول لعرضه… ميزانية الفيلم حوالي 7 ملايين دولار فقط!

الموسيقى التصويرية أيضًا لعبت دور مهم في الأحداث وقدرت تقدم لنا حالة من التشويق والإثارة وترقب كل مشهد وزودت من حالة الخوف، لكن للأسف المؤثرات الصوتية والبصرية والموسيقى التصويرية فشلت في أنها تكون السبب في نجاح الفيلم بالكامل، لأن العامل الأساسي كان مكرر وضعيف ومافيهوش تجديد… والعامل ده كان القصة والسيناريو.

آخر كلامنا عن The Bye Bye man أنه فيلم موجه بالأساس للجمهور من المراهقين، ومحبي أفلام الرعب مهما كان مستواها، ومحبي الأفلام اللي لو حتي فكرتها مكررة ماعندهمش مشكلة يتفرجوا عليها مرة بعد مرة.

علشان تبقى عارف:

• الفيلم حقق نسبة 3.8 من 10 على موقع IMDB وهى نسبة منخفضة.. عدد المصوتين على الموقع كان حوالي 2000 مشاهد للفيلم.
• على موقع تقييم الأفلام rottentomatoes الفيلم حقق 22% وهو رقم منخفض جدًا برضو.