The Definitive Guide to Living in the Capital , Cairo , Egypt

يبدو أننا لازم ننتظر وقت طويل نسبيًا قبل ما نشوف فيلم رعب بتيمة جديدة، لكن اللعب على تيمات الرعب الحالية مش دايمًا بتكون نتيجته سيئة، وفيلم The Devil’s Candy يعتبر مثال قوي على كيفية تناول تيمة رعب قديمة ومكررة، لكن بشكل جديد، وحتى لو التجديد لم يكن بنسبة 100% لكن يكفي صناع الفيلم شرف المحاولة، ويكفي المشاهدين حالة الرعب اللي كانوا عليها أثناء مشاهدة الفيلم.

قصة The Devil’s Candy

الفيلم بيحكي عن قصة رسام بينتقل مع أسرته لمنزل أحلامهم في منزل ريفي في ولاية تكساس الأمريكية. لكن دايمًا الأمور مش بتمشي بشكل وردي –خاصة في أفلام الرعب- لما بتكتشف الأسرة وقوع رب الأسرة أسيرًا لقوى خفية بتستحوذ عليه وبتغير مجرى حياته وحياتهم علشان يدخلوا جميعًا في سلسلة لا تنتهي من الأحداث المرعبة.

فريق العمل

الفيلم من تأليف وإخراج شون بيرن، ومن بطولة إيثان إمبري وشيري آبلباي وكيارا جلاسكو وماركو بيريلا، وهو من نوعية الأفلام اللي ممكن يكون عدد أبطالها قليل لكن في المقابل الأحداث بتحتوي على مجموعة من الألتواءات المختلفة والشيقة.

السيناريو والحوار والإخراج

إخراج الفيلم كثف كل مجهوده على الجانب المرعب من الأحداث، يمكن لأن المخرج كان عارف أنه مش بيقدم قصة أصلية أو جديدة بنسبة 100% بل على العكس هو بيقدم قصة مكررة شوفناها في كتير من أفلام الرعب، بالتالي كان لازم التركيز كله يكون على المشاهد المرعبة، ومن هنا بتيجي قوة وأهمية السيناريو.

والحقيقة أن سيناريو الفيلم قدر يتحمل العبء الملقى عليه، وقدر يقدم حبكة قوية ومشاهد مميزة، وتضافر معه الحوار علشان يقدموا لنا في النهاية فيلم مرعب وقادر على جذب الانتباه من المشهد الأول للأخير.

الموسيقى والديكور والمؤثرات

على الرغم من الدور الكبير اللي المفروض تلعبه الموسيقى التصويرية والديكورات في أفلام الرعب، إلا أن مستواها في The Devil’s Candy كان ضعيف ولم يرقى للمستوى المطلوب. وكنا متوقعين من الموسيقى والديكورات أنها تكون أقوى من كده بكتير. لكن المؤثرات الخاصة لعبت دورها على أكمل وجه، ولو كانت الموسيقى والديكورات تعاونت معها كان ممكن نشوف فيلم رعب غير مسبوق.

الخلاصة

لو من عشاق أفلام الرعب اللي بتتكلم عن الاستحواذ والمس الشيطاني. لازم تتفرجوا على The Devil’s Candy.

علشان تبقى عارف: عرض الفيلم في أمريكا في 27 سبتمبر 2016 ثم في الكويت في بداية 2017 وفى الإمارات قبل مصر بفترة وتحديدًا في 6 أبريل الماضي.