فيلم The Devil’s Dolls مش بس بيكتفي بتقديم قصة عن الاستحواذ الشيطاني، لكنه بيمزج الرعب ده -وهو نوع شهير من أنواع الرعب- مع الرعب القائم على المجهول، في وجود قاتل متسلسل بينفذ مجموعة من الجرائم اللي بتدوخ الشرطة ومحققيها!
القصة
فيلم The Devil’s Dolls بيحكي عن محقق شرطة بيحاول ينقذ بنته من لعنة بتحل على المدينة اللي عايش فيها. اللعنة اللي بتصيب معظم السكان تقريبًا، بتتزامن مع ظهور قاتل متسلسل بينفذ مجموعة من الجرائم، وبيكون أمام الشرطة مهمة مزدوجة مابين التصدي للعنة مرعبة، ومواجهة القاتل اللي بينفذ جرائمه البشعة.
فريق العمل
الفيلم من إخراج بادريج رينولدز ومن تأليف كريستوفر ويل، أما البطولة فكانت من نصيب كريستوفر ويل وكيم جاكسون مع تينا لاففورد وسامانثا سميث.
الإخراج والسيناريو والحوار
إخراج الفيلم كان جيد، لكن الأداء التمثيلي للممثلين نفسهم لم يكن على المستوى المطلوب، والحقيقة إن تحديد ضعف الأداء التمثيلي بيكون مسئولية المخرج أم الممثلين بيحتاج تركيز كبير، لكن في حالة The Devil’s Dolls نقدر نقول إن الإخراج مش مسئول عن ضعف الأداء التمثيلي، بقدر ما الفنانين نفسهم مسئولين عن ده.
أما السيناريو والحوار فكانوا جيدين، لكن سوء الأداء التمثيلي كان هو المسيطر على كل ملاحظاتنا بخصوص الفيلم.
التمثيل والموسيقى والديكور
على الرغم من تواضع الأداء التمثيلي، وعدم قدرة المؤثرات الخاصة أو حتى المكياج على أنهم يعوضوا ده، نقدر نقول إن الديكورات والموسيقى التصويرية كانت مختلفة، وجعلت تجربة المشاهدة معقولة شوية، وعوضت كل الفشل اللي تسببت فيه باقي عناصر الفيلم.
الخلاصة
فيلم The Devil’s Dolls فيلم رعب فكرته مش جديدة لكنه بيقدم مشاهدة ممتعة لمحبي أفلام الأرواح الشريرة اللي بتستحوذ على البشر.
علشان تبقى عارف:
حوالي ألف مستخدم لموقع IMDB أعطوا الفيلم تصنيف 4.2 من 10 وده يعتبر تصنيف منخفض على الموقع.