The Definitive Guide to Living in the Capital , Cairo , Egypt

لو دققنا في تفاصيل حياتنا واللحظات المحورية فيها، أو الأحداث والأفكار اللي بتخلينا ناخد أكبر التحولات الجذرية في حياتنا… كل ده هيكون بسبب تفاصيل في منتهى الصغر من حيث الحجم لكن تأثيرها في حياتنا كان عظيم ولا يمكن إنكاره… ده اللي بيحكي عنه The Girl On The Train.

الفيلم من إخراج تيت تايلور، وتأليف إيرين كريسيدا ويلسون عن رواية بولا هوكينز، ومن بطولة إيملي بلانت، هالي بينيت، ريبيكا فيرجسون، وجاستين ثيروكس.

فيلم The Girl On The Train  بيحكي عن سيدة شابة بتعاني من مشاكل نفسية ومشاكل مع إدمان الكحول.. بتسافر يوميًا بالقطار وبتشوف أثناء سفرها حبيبين عايشين في منزل رائع وواسع.. بطلتنا (راشيل) شافت من خلال نافذة القطار الحياة المثالية اللي كانت بتتمنى تعيشها طوال حياتها.. لكن تعقيدات الأحداث بتاخدنا في دوامات من الإنفعالات النفسية والإجتماعية وحتى البوليسية.. واللي بتغير فكرتنا عن راشيل وحياتها والتصرفات اللي بتعملها في حياتها اليومية 180 درجة.. ودي الأحداث اللي مش عاوزين نحرقها عليكم في الفيلم.

الأداء التمثيلي لأبطال الفيلم كان جيد.. وقدرنا نحس بكم المعاناة النفسية والضغوط اللي بتقع تحتها البطلة، لكن للأسف ضاع الأداء التمثيلي وسط حالة التخبط اللي مر بيها السيناريو، واللي أفقدتنا جزء كبير من متعتنا بالفيلم، وأشعرتنا بالملل الشديد أو أحيانا عدم القدرة على فهم الأحداث بنسبة 100%.

مع اقتراب الأحداث من النهاية بدأت الخيوط الرئيسية للأحداث تتحل وده كان كويس وبدأنا نحس بسيطرتنا من جديد على الأحداث، بل وانجذابنا لمتابعتها من جديد لكن يظل السيناريو فيه مشكلة أساسية في خلق مناطق التشويق والإثارة، والقدرة على جذب المشاهدين للمتابعة.

الإضاءة في الفيلم كانت متميزة، وقدرت تعكس المشاعر النفسية للأبطال.. الديكورات كمان كانت رائعة، لكن الموسيقي التصويرية كانت ضعيفة وغير موظفة بكفاءة في الأحداث.

فيلم The Girl On The Train من نوعية الأفلام اللي مهم تتفرج عليها في السينما علشان تخوض التجربة بنفسك، شوفوه لو كنتم من محبي أفلام الغموض والإثارة والتقلبات الكبيرة في الأحداث.