The Definitive Guide to Living in the Capital , Cairo , Egypt

مفهوم العدالة، ونظرة الناس لها بـ يختلف من ثقافة لأخرى، وبـ يختلف من نفس بشرية لأخرى، البعض قادر على التسامح، والبعض الآخر عاوز يأخذ حقه للنهاية، وما بين الأساليب المختلفة للحصول على الحق بـ يتكلم فيلم The Lone Ranger عن مفهومين أساسيين للقصاص، مفهوم  أخذ الحق بالذراع واستعمال العنف والقتل والرصاص، والمفهوم الثانى بـ يتمثل فى القانون والعدالة القائمة على تطبيقها من قبل رجال القانون فقط.

من إخراج جوري فيربينسكي وتأليف تيري روسيو وتيد إليوت بـ نشوف جونى ديب وأرمى هامر فى دراما إنسانية يغلب عليها الطابع الكوميدى إلى حد ما، بين محاولة رجلين من بيئتين ثقافيتين واجتماعيتين مختلفتين تمامًا، بـ يوحد بينهم الرغبة فى الانتقام من قاتل محترف متخصص فى القتل والتهام قلوب ضحاياه!

مهما مر الوقت بـ يتم إظهار الرجل الهندى بصورة الرجل المتعطش للحصول على حقه بالدم والقتل، بينما بـ يظهر الأمريكى رجل القانون (أرمى هامر) بصورة الرجل اللى عاوز يحقق العدالة باستخدام القانون والدستور، لكن أى قانون وأى دستور اللى ممكن يتم تطبيقه فى صحراء الويسترن الأمريكى حيث القتل هو اسم اللعبة والمسدس هو أقصر الوسائل للحوار!

الاختلاف بين الرجلين بـ يترتب عليه عدد كبير من المواقف الكوميدية، ما حسيناش بأى شىء مفتعل أو مبتذل فيها، ونقدر نقول أن الفيلم شدنا للمشاهدة والمتابعة من اللحظة الأولى، ماعدا بعض المشاهد فى منتصف الفيلم اللى حسينا فيها ببعض الملل أو حسينا بالزهق بـ يتسرب لنا.

الديكورات كانت قوية ومقنعة، خصوصًا الملهى الليلى أو ديكور القرية اللى بـ يوصل لها (الحارس الوحيد) فى بداية الفيلم، وطبعًا تنفيذ مطاردات القطار فى المشاهد الافتتاحية من الفيلم كانت أكثر من رائعة على الرغم من تصويرها بأسلوب الأكشن الكوميدي اللى بـ نعتبره من أصعب أنواع الأكشن لأنه بـ يخلط الكوميديا بالحركة.

ما حسيناش بدور قوى للموسيقى التصويرية، على الرغم من اهتمام أفلام الويسترن دائمًا بالتنويعات الموسيقية الجديدة والغريبة و”الحراقة” فى بعض الأحيان، إلا أنه من الواضح أن المخرج كان مصمم طوال الوقت يخرجنا من جو الويسترن إلى الهدف الأسمى من الفيلم وهو مفهوم العداله واختلافه من شخص لآخر.

The Lone Ranger فيلم ظريف وخفيف تقدر تشوفه لو بـ تحب أفلام جونى ديب وطريقته المتميزة والمختلفه فى التمثيل.