The Definitive Guide to Living in the Capital , Cairo , Egypt

فكرة عمل فيلم بـ يتناول فيلم آخر أو مجموعة أفلام بالسخرية والانتقاد مش جديدة على هوليوود، ويمكن أشهر سلسلة أفلام اتبعت أسلوب تقديم الأفلام الساخرة من أفلام ثانية كانت سلسلة أفلام Scary Movie اللي بـ تتريق على مجموعة الأفلام المرعبة اللي ظهرت مؤخرًا في السينمات.

من إخراج جيسون فريدبيرج وآرون سلتزر بـ نشوف مايارا والش وبرانت دوجيرتي في محاكاة ساخرة لسلسلة الأفلام القوية The Hunger Games لكن المرة دى من خلال تنظيم مسابقة بـ تكون جائزتها كوبون لوجبة برجر! السخرية مش بس في الهدف من الفيلم لكن بـ تطول كل أحداث السلسلة المشهورة اللي بـ يتم تقديمها بأسلوب عكسي تمامًا للسيناريو الأصلي للفيلم الأساسي.

مشكلتنا الوحيدة للفيلم أن أي شخص ما شافش الأجزاء الأصلية لـ “ألعاب الجوع” هـ يشوف الفيلم مجرد كوميدي سخيف، إلا أن محبي ومتابعي السلسلة الأصلية هـ يحسوا بالكوميديا من وراء الفيلم الساخر اللي مش بس بـ يتعرض لسلسلة ألعاب الجوع بالنقد لكن بـ يتجاوزها لأفلام ثانية زي Avatar و The Avengers وغيرهم من الأفلام.

من الصعب أننا نتعرض للموسيقي التصويرية أو الديكور بالنسبة لفيلم ساخر كل هدفه تقديم جرعة من السخرية والضحك فى حوالي ساعتين هى عمر الفيلم، لكن نقدر نقول أن مستوى الموسيقي التصويرية والديكور كان أقل من المعتاد لكنه جاء مساوى لقوة الفيلم اللى عارف بالضبط هو بـ يخاطب مين وبـ يقدم لهم إيه.

فكرة تقديم أفلام ساخرة من أفلام ثانية مش جديدة حتى على الواقع المصرى، حاول قبل كده أحمد الفيشاوي تقديم عمل مماثل من خلال فيلم ورقة شفرة على سبيل المثال، أو بعض تطعيمات أحمد مكي لبعض أفلامه زى “لا تراجع ولا استسلام (القبضة الدامية)” اللى تعرض فيه للسخرية من أفلام محمد سعد أو أحمد السقا، إلا أن التجارب دى لم تقابل بالترحاب التام من المشاهد اللي كان متوقع مجهود أكبر وكوميديا أصلية مش معتمدة على أفلام أخرى، بنفس الطريقة اللي بـ يتم استقبال الأفلام الهوليوودية اللي بـ تمشى على نفس النهج.

 The Starving Gamesبـ يقدم جرعة كوميدية مش هـ يفهمها غير اللي شاف سلسلة أفلام ألعاب الجوع، واللي ننصحكم بمشاهدتها قبل مشاهدة فيلم اليوم.