The Definitive Guide to Living in the Capital , Cairo , Egypt

يظهر الجزء الرابع من
نفس السلسلة بشكل أفضل من الأجزاء الثلاثة السابقة، وكأن الأجزاء اللي فاتت مقدمة
طويلة جدًا للوصول للصراع المحتوم والمُنتظر طويلاً.

فجأة تصحى مصاصة
الدماء “سيلين” علشان تلاقي نفسها نائمة لمدة 12 سنة كاملة في مكان اسمه
“مفاعل المضادات”، ولما تتحرر تعرف أن فيه شخص ثاني كان في نفس المكان
هو اللي حررها، تستعيد “سيلين” ذكرياتها مع اكتشاف البشر لوجود مصاصي
الدماء والمستذئبين ومحاولة قتلهم في عملية معروف باسم “تطهير الملوثين”.

هنا تحاول
“سيلين” البحث عن حبيب قلبها “مايكل” الهجين، وهو نوع نادر بـ
يجمع بين الفصيلتين المستذئبين ومصاصي الدماء –ظهر في الأجزاء الثلاثة اللي فاتت–
واللي اختفى في أحدى عمليات “تطهير الملوثين”، لكنها تفاجأ بأنها بـ
تشوف بعينيها أحداث خاصة بشخصية ثانية، تحس أنه “مايكل” لكنها تكتشف أنها
ابنتها “إيف” من “مايكل” واللي برضه طلعت صورة من والدها!

هنا يحاول المستذئبين
الوصول لـ “إيف” لسبب غير مفهوم في البداية، وتحاول “سيلين”
الوصول لـ “مايكل” وإنقاذ ابنتها من شر البشر والمستذئبين بمساعدة ضابط
الشرطة البشري “سباستيان” ومصاص الدماء الشاب “ديفيد”، لكن
السؤال: يا ترى هـ تقدر؟

تقنية الـ 3D الحقيقة خلتنا نتعايش أكثر مع
الجزء الجديد، مع أن الجمهور من محبي السلسلة أنفسهم –زي ما شوفنا– انقسموا لفريقين:
فريق شايف أن الجزء الجديد مبهر، والفريق الثاني العكس، وإن كنا نميل للفريق
الأول، خاصة مع ابتعاد الفيلم عن سرد التاريخ زي الأجزاء اللي فاتت، وإن كان ذكر
المشاهدين في البداية بأهم الأحداث اللي حصلت علشان يقدروا يتابعوا الجزء الجديد.

لكن تفضل المشاهد
الدموية أصعب من الأجزاء اللي فاتت بدون فهم السبب، كمان التركيز عليها في الكثير
منها –خاصة مشاهد الصراع بين المستذئبين ومصاصي الدماء– جعل فيه إحساس بالضيق لأن
الأجزاء اللي فاتت كانت بـ تهتم أكثر بعنصر السرد والحكي، وبالمقارنة هـ نلاقي
الجزء ده أسرع في إيقاعه، مكثف جدًا، على أفضل ما يكون في تقديم عنصر المفاجأة،
لكن ده طغى عليه –زي ما قلنا– المشاهد الدموية.

كمان وصوله لنقطة –طال
انتظارها– وهي الصراع الثلاثي بين المستذئبين ومصاصي الدماء والبشر، وإن كان
الفيلم –كعادة الأجزاء اللي فاتت– يميل لمصاصي الدماء باعتبارهم قوة مغلوبة على
أمرها، خاصة أن البطلة “سيلين” هي في الأساس مصاصة دماء خاصة جدًا.

طبيعي فيه وعد بالجزء
الخامس من نفس السلسلة وإن كان واضح أنه هـ يتبعه جزء سادس وسابع كمان.. والله
أعلم!