أماكن تخرج فيها مع مامتك في عيد الأم
Mohammed Sabry
كتب: محمد صبري
عيد الأم النهارده، وكله مشغول بالهدايا وهيجيب إيه ومايجبش إيه. وطبعًا الموضوع بياخد شوية تفكير علشان نطلع بفكرة جديدة. بس المشكلة دي حليناها في مقالنا عن هدايا غير تقليدية لعيد الأم. بس إحنا فكرنا كمان في حاجة مختلفة غير الهدية، خروجة لطيفة – مع الهدية طبعًا – تغير بيها موود مامتك. وتخلي فرحتها فرحتين: هدية وخروجة حلوة.
فاميلي مول 6 اكتوبر
تقدر تخلي مامتك تقضي عيد الأم السنة دي بشكل مختلف في فاميلي مول 6 اكتوبر. هناك هتستمع بالجو الجميل والقعدة المريحة في منطقة المطاعم والكافيهات. وتتفرج على النافورة الراقصة. ده غير إن المكان فيه أقفاص لحيوانات وطيور مختلفة، ممكن تلعب معاهم وتاخد شوية صور حلوين. تقدروا تعرفوا أكتر عن المول من هنا.
معرض الزهور بحديقة الأورمان
ممكن كمان تاخد مامتك وتوديها معرض الزهور في حديقة الاورمان. اللي فيه أنواع كتير والزهور والنباتات المختلفة. وتخليها تشتري الأنواع اللي هي عايزاها وبتحبها. ده غير منتجات تانية كتيرة بيقدمها المعرض. تقدروا تعرفوها من مقالنا عنه من هنا.
حفلة مخصوص لعيد الأم
في مناسبة زي دي، أماكن كتير بتهتم إنها تعمل حفلات وإيفينتات خاصة بالأم. بتقدم فيها فقرات وأغاني وهدايا جميلة تبسط مامتك وتخليها سعيدة. منها مثلا حفلة “فسحها في عيدها” في مركز دوار. اعرفوا تفاصيلها من هنا. أو غيرها من الحفلات الخاصة بالمناسبة دي.
خروجة حلوة كده في أي كافيه
في اليوم ده خد مامتك من إيدها، وانزلوا افطروا مع بعض في أي كافيه أو مكان على النيل. حاجة كده شغل فنادق. ويا سلام بقى لو تديها هديتها هناك. كده أسيادنا راضيين عليك لحد السنة الجاية. وطبعًا تقدر تزود شوية حركات من عندك، يعني تكون متفق مع إخواتك ييجوا لك على هناك. أو تتفق مع أصحابك وأمهاتهم وتبقى مفاجأة ولمة حلوة. انت وخيالك بقى. بس ماتنساش تخليها تدعيلنا بقى.
كل سنة وكل أم في مصر مبسوطة وبخير.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
