The Definitive Guide to Living in the Capital , Cairo , Egypt

من كام يوم وزارة الزراعة أعلنت عن افتتاح معرض زهور الخريف اللي بينظموه لأول مرة كنسخة خريفية لمعرض زهور الربيع الأشهر على الإطلاق في حديقة الأورمان، ولكن المرة دي مكانه في المتحف الزراعي في الدقي، وكمان مش كبير زي معرض الربيع، وإحنا قررنا في كايرو 360 نزور المعرض وننقلكم الصورة كاملة عنه، وميزته أن التصوير فيه ببلاش.

المعرض مستمر ليوم 24 ديسمبر، يعني عندكم وقت كبير تروحوه، وهو موجود في المتحف الزراعي اللي خلف وزارة الزراعة، وجنب شارع 306، وتذكرة الدخول بـ 3 جنيه بس، وللأسف المتحف نفسه مش شغال حاليًا علشان بيتجدد، ومتوقع انه يشتغل في نوفمبر اللي جاي، وهناك هتلاقوا مكان تركنوا فيه عربياتكم، ولو هتروحوا مواصلات أي عربية بتعدي من شارع الدقي أو رايحة البطل أحمد عبد العزيز هتنزلكم قصاد الشارع، ولو بالمترو فأقرب محطة هي الدقي، وهتتمشوا 10 دقائق قبل ما توصلوا، وهو شغال من 8 الصبح حتى 9 بالليل، وحسب ما أعلنت وزارة الزراعة ففيه 170 مُنتج بيشتغلوا في مجال الزهور وتنسيق الحدائق، ونباتات الزينة، والظل، والصبارات النادرة، واللاندسكيب ومستلزمات الحدائق، موجودين هناك وده غير منفذ الوزارة نفسها.

رحنا المعرض، ودخلنا، وأول مكان لقيناه في وشنا كان منفذ بيع “عسل” وهتلاقوا غيره جوا المكان، وده عندهم كل أنواع العسل الطبيعي، وفي العموم المعرض فيه منتجات عسل من مزارع الوزارة ومن الوادي الجديد وجبلي وسيوة، والأسعار متفاوتة ومختلفة حسب كل نوع، وكمان هتلاقوا منتجات أسوان الجميلة الطبيعية زي البهارات والكركديه وشغل الهاند ميد، وتقدروا تشتروا هدايا مصنوعة مخصوص من هناك، وماتنسوش كمان منتجات الوزارة المختلفة، وكتب تعليم الزراعة، ولو محتاجين عصافير وحمام وأرانب وبغبغان أو مستلزماتهم وأكلهم، هتلاقوهم متوفرين هناك.

وبما أنه المعرض للخريف، فماتتخضوش من كمية نباتات الصبار اللي معروضة هناك، واستمتعوا بمشاهدة أشكال صبار مختلفة ومميزة، والقصاري بألوان حلوة مبهجة، وبتبدأ الأسعار من 15 جنيه وبتوصل لحد 600 جنيه للصبارة الواحدة، أهم حاجة تبقوا عارفين عاوزينها لإيه، هل زينة ولا هتستخدموا زيتها وهل هتحطوها في مكان مفتوح ولا هتكون في البيت، ولا محتاجينها لتزيين المكتب.. الخ.

كمان هتلاقوا مجموعة من أنواع الزهور الصغيرة واللي مش مرتبطة بفصل معين، ولكن بكميات قليلة، وهتاخدوا نصائح من العاملين لو قررتوا تشتروا الأنواع دي، وإزاي تحافظوا عليها، وكمان تقدروا تشتروا من هناك أي مستلزمات للزراعة، زي التربة والكيماويات والأسمدة.

عندهم كمان ناس متخصصة في اللاند سكيب وتجهيزات الملاعب والنجيلة الصناعي، ولو أنتم من هواة الديكور تقدروا تتعرفوا على مجموعة من الديكورات اللي ممكن تتعمل في الحديقة أو البيت أو المكتب أو غيرهم، وكمان هتلاقوا ناس بتبيع نوافير شلالات مياه شكلها مميز.

للأسف المكان مش مجهز لاستقبال حدث مميز زي ده، وكان محتاج يكون فيه إمكانيات أكتر بكتير عن كده والأرض تكون مؤهلة للزوار، ومفيش فيه مكان لقعدة أو كافيتيريا ترتاحوا فيها، وبننصح بشدة عدم استخدام الحمامات هناك لإنها مش أرقى حاجة، وهتكتشفوا ان الحمامات مشتركة “سيدات ورجال”.