The Definitive Guide to Living in the Capital , Cairo , Egypt

فكرة ألعاب الهروب انتشرت في القاهرة بشكل كبير خلال السنتين اللي فاتوا وكلها بتدور حوالين نفس الفكرة؛ أنت محاصر في موقف معين ومحتاج تهرب من الغرفة خلال 60 دقيقة عن طريق حل الفوازير الموجودة فيها. الموضوع لطيف مفيش كلام، لكن ظهر نوع جديد من الغرف بأفكار جديدة.

صحيح أجدد لعبة هروب ظهرت على الساحة وهي “ذا ميز-The Maze” قدرت تميز نفسها عن الباقيين بإن اللاعبين بيكونوا في متاهة حقيقية، لكن الموضوع مع “بلاسيبو-Placebo” مختلف.

بلاسيبو فتح في شارع 9 في المعادي وبيقدم لعبة عبارة عن تقمص الشخصيات في حكاية معينة، بمعنى إن كل لاعب بيتقمص شخصية معينة ويلعب دورها في القصة. الفكرة إن الهدف من اللعبة مش بس الهروب من الغرفة، المطلوب كمان إنك تعرف الحكاية بتتكلم عن إيه.

يوم زيارتنا لبلاسيبو كان في غرفتين متوفرين: ليمبو Limbo وألتر Alter. الغرفة الأولى بتتلعب من ثلاثة لخمسة أفراد وهي عبارة عن عائلة سفاحين بيدخلوا في حالة من السكون أو الجمود والمطلوب من اللاعبين يعروفوا السبب. أما الغرفة التانية فبتدور حوالين بنت اسمها هنا بيحصل لها موقف بيغير حياتها للأبد والمطلوب من اللاعبين يعرفوا إيه اللي حصل لها وليه؛ العدد المثالي للعبة من ثلاثة لسبعة أفراد.

في طريقتين للعب أو ممكن نقول مستويين، مستوى ‘Smart’ وده المستوى الأول اللي بيساعدوك فيه بتلميحات تخليك تقدر تحل اللغز، أما المستوى التاني ‘Brilliant’ فمفيش فيه أي مساعدة من أي نوع.

قبل ما ندخل الغرفة شرحوا لنا الخطوط العريضة للحكاية وشوية تعليمات زي “إلعبوا مع بعض كفريق واحد” و”حاولوا تكتشفوا القصة والشخصيات اللي بتلعبوها” عشان وأنت داخل مش بتعرف الشخصية اللي هتلعبها.

إحنا كنا خمسة واخترنا غرفة Alter  المستوى الأول، وابتدينا ندور على التلميحات اللى عن  طريقها هنقدر نمشي مع القصة وكمان نكتشف الشخصيات اللي بنلعبها ودور كل واحد منهم في الحكاية. الفكرة إن كل دليل بنوصل له هيعرفنا حدث جديد من أحداث الحكاية. الديكورات هنا كانت على شكل غرفة بنت صغيرة. وعلى عكس باقي ألعاب الهروب التانية، كل دليل هنا له معنى ومفيش حاجة عشوائية أو معتمدة على الحظ، وفي كمان حاجات لتشتيت تركيز اللاعبين.

قدرنا نحل اللغز قبل أربع ذقائق من نهاية الساعة الممتعة المليانة ألغاز وتشتيت وأفكار ممتعة. بصراحة إحنا شايفين إن بلاسيبو قدر يوصل لمستوى أعلى من باقي غرف الهروب من ناحية المتعة والإثارة وكمان فيه مرونة أكتر عشان الشخصيات هي المتحكمة في سير القصة ونهايتها.

المبهر كمان في بلاسيبو إن فريق العمل هم اللي ابتكروا القصص، فإحنا مستنيين على نار القصص والحكايات الجديدة قريب.

لمعلومات أكتر شوفوا صفحة بلاسيبو على الفيسبوك.