“بوابة مرور مصر”… طريقك لتجديد الرخصة أونلاين
إدارة النظم والمعلومات الإدارة العامة للمرور بوابة مرور مصر رخص قطاع المرور وحدات المرور وزارة الداخلية المصرية
Omar Abd-elmaqsoud
اليوم اللي بتنتهي فيه رخصة عربيتنا أو الموتسكلات بتاعتنا، بيبقى يوم صعب وبيسجله التاريخ بحروف من التعب و الأرق علينا كلنا، وده لسبب مش بسيط خالص.
الوقفة في طوابير طويلة عريضة والصحيان من صباحية ربنا ولأجل غير مسمى، علشان بس نلحق دور بدري في الطابور اللي عمره ما بيخلص، وعمرنا ما بنلحق دور بدري برده.
ده غير طبعًا دورة الأوراق الناقصة واللي لازم نكملها بالطلوع والنزول على السلالم والوقوف والتنطيط من شباك لشباك، واللي دايمًا بيبقى سبب كافي لإنه يخلي تاريخ انتهاء الرخصة المكتوب في ظهرها، تاريخ كئيب مش بنحب نبصله ولا نفتكره، لحد ما يهل علينا فجأة وبدون مقدمات.
وزي ما تقول كده “إدارة النظم والمعلومات” تقريبًا حست بينا وبمعاناتنا في رحلة المرواح للمرور علشان نطلع أو نجدد رخص للعربيات والموتسيكلات، أو ندفع المخالفات، وأعلنت عن إطلاق موقع “بوابة مرور مصر” واللي هيسمح لك بتجديد وإصدار كل الرخص سواء العربيات أو الموتسيكلات أقل من 2030 سي سي، واللي كمان ممكن من خلاله نستخرج بدل فاقد للرخص وشهادات البيانات.
“بوابة مرور مصر” يعتبر خطوة جديدة فى قطاع المرور علشان تخفيف الزحمة على شبابيك التراخيص في الوحدات المرورية على مستوى المحافظات و مديريات الأمن، وده كما بدوره هيخف من علينا أعباء اليوم ده..
طبعًا أكيد أول سؤال هنسأله .. هستلم الرخصة الجديدة إزاي من خلال الموقع؟ بص يا سيدي، الموقع بيديك أوبشن وانت بتجدد الرخصة إنك تختار ما بين توصيل الرخصة لعنوانك اللي هتحطه، أو إنك تستلمها من وحدة المرور التابعة ليك، وده طبعًا في حالة إن العربية أو الموتسيكل مش في حالة فحص أو حظر، وإذا اخترت توصيل الرخصة للعنوان المحدد، بعد إصدار الرخصة مباشرةً هيتضاف رقم شحنة التوصيل على طلبك، واللي تقدر من خلاله تتابع مع شركة الشحن.
علشان ماندورش كتير، البوابة الجديدة دي هتكون جوه موقع وزارة الداخلية في الجزء المخصص لتقديم الخدمات اللازمة للقطاعات الخدمية، سواء الجوازات أو المرور أو الأحوال المدنية.
مش بس كده، خد الجديد بقى، خلال الفترة الجاية “إدارة النظم والمعلومات” هتبعت المخالفات بكل تفاصيلها، نوعها، والزمان والمكان، وقيمة الغرامة، على الموبايل الخاص بيك، في حالة لا قدر الله ارتكبت مخالفة، والخدمة دي مقتصرة حالياً على مرور محافظتي القاهرة والجيزة، لكن هتطبق قريب في معظم المحافظات.
لزيارة الموقع اضغط هنا.
مقترح
فن وثقافة
في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير +5
معالم وسياحة
