The Definitive Guide to Living in the Capital , Cairo , Egypt

كل يوم بداية جديدة لتجربة مختلفة في حياتك، منها اللي يبسطك ومنها اللي بتتعلم منه، ولأن الحياة أقصر من إنها تتقضى في البيت حاول تخرج طول الوقت.. وتستمتع بالدنيا. في السطور الجاية هنقول لك على أفضل الأنشطة الفنية والثقافية اللي هتحصل في الويك إند.

نبدأ بالنهارده يوم الخميس، وهتلاقوا حفلتين على مسرح عرائس الساقية “أم كلثوم تعود من جديد” على مسرح الحكمة في ساقية عبد المنعم الصاوي الساعة 6 والساعة 8، وسعر التذكرة 25 جنيه.

برضه في الساقية فيه حفلتين لفرقة كايروكي في قاعة النهر، حفل هيبدأ الساعة 4 وحفل هيبدأ الساعة 7، وسعر التذكرة 75 جنيه

أما في رووم فهي بتدعوكم لحفلة من أغاني أفلام ديزني، بالعربي والإنجليزي مع فريق “هيستريا” المسرحي. وسعر التذكرة: 50 جنيه.

وننتقل ليوم الجمعة، ودعوة مفتوحة من جرامافون لكل اللي بيحبوا المزيكا، سواء لعب أو سماع. وسعر التذكرة: 50 جنيه.

برضه رووم بتدعوكم لليلة مايك مفتوح علي المسرح، لكل المواهب المختلفة. وسعر التذكرة: 50 جنيه.

كمان  فيه حفل روك لفرقة أندروميدا بمسرح النهر في ساقية عبد المنعم الصاوي، وسعر التذكرة 75 جنيه.

أما في الأوبرا ففيه حفل لفرقة سويت ساوند مع منير نصر الدين على المسرح المكشوف بدار الأوبرا المصرية.

ولعشاق الأغاني النوبية، حفل منيب باند على مسرح الحكمة في ساقية عبد المنعم الصاوي، وسعر التذكرة 35 جنيه.

ونختم بيوم السبت، وحفل فرقة بهية في روم أرت سبيس، وسعر التذكرة 50 جنيه.

برضه فيه حفل أوركسترا القاهرة السيمفوني على المسرح الكبير في دار الأوبرا المصرية.

كمان هتلاقوا حفل فرقة وسط البلد على مسرح النهر في ساقية عبد المنعم الصاوي، وسعر التذكرة 75 جنيه.

ولو عاوزين تتعلموا حاجة جديدة  فمساحة باب 18 عاملة ورشة لعمل شنطة جلد. وتكلفة الورشة: 1800 جنيه شاملة الخامات.

لو عاوزين تعرفوا أكثر عن الأحداث اللي بننشرها كل يوم على مدار الشهر تابعوا أجندتنا.

ويك إند سعييد!