دليل أحداث نهاية الأسبوع: مهرجان الجاز وحفلات بالأوبرا وأكلات شهية
Cairo 360
الجو ربيعي نموذجي ومغري للخروج والأكل والشرب، مستعدين للويك إند كويس ولا
إيه؟ عندنا شوية أفكار نتمنى أنها تعجبكم، صحيح كله بـ يستعد دلوقتي لعيد الأم وبـ
يدور على أماكن يجيب منها الهدايا أو عاوز أفكار لفسحة حلوة يفرح بها أمه، لكن
ما تقلقوش، كايرو 360 هـ تعمل لكم دليل مخصوص عن أحسن أماكن تشتري منها هدايا وأحسن
أماكن تروحها الأمهات اليوم ده، والموضوع هـ ينشر على بداية الأسبوع القادم، بس خلينا
هنا نستمتع بالويك إند ده وكله بأوانه.
قبل ما نقول لك على الأحداث الفنية والثقافية هـ نرشح لك مطعم آسيوي أصلي ظريف
جدًا في المعادي اسمه «دراجون هاوس» بـ
يقدم أكل تايلاندي وصيني وهندي، ممكن تكسر الملل وتأخذ أي حد بـ تحبه وتروح تأكل
هناك، خاصة أن في أيام الويك إند (خميس وجمعة وسبت) المطعم بـ يبقى عامل بوفيه
مفتوح بأسعار معقولة.
وفيه فكرة ثانية لخروجة حلوة لو كنت من هواة التمشية في
شوارع المهندسين وهو محل حلوى الوافل المفرحة «وافل
بييز» الموجود بالقرب من مسجد مصطفى محمود، ممكن تأخذ لك واحدة كده وأنت رايح أي مشوار من
المشاوير اللي هـ نقول لك عليها دلوقتي.
النهاردة الخميس ميعاد افتتاح مهرجان القاهرة لموسيقى الجاز اللي هـ تقدم من خلاله
عدد كبير من الفرق المصرية والأجنبية عروضها في ساقية الصاوي وجاز بار الموجود
بفندق كمبنسكي بجاردن سيتي وكايرو جاز كلوب بالمهندسين، المهرجان مستمر لمدة 3 أيام هي
أيام الويك إند، الفرق كثير والعروض أكيد هـ تعجبكم زي ما عجبتنا السنة اللي فاتت،
وممكن تعرف جدول العروض والفرق الموجودة من خلال أجندة
موقعنا.
وحشتنا دار الأوبرا المصرية، عرض رائع بـ ينتظركم الليلة على المسرح الكبير
وهو عرض راقص على موسيقى الهيب هوب مع فرقة رينيه
هاريس الأمريكية، الحق احجز تذكرتك، الأسعار 75 و50 و35 جنيه، وفيه أسعار
خاصة للطلبة.
في ياسو لاونج في شارع النيل بالجيزة هـ يلعب دي جي
هوندا مجموعة من أقوى تراكاته الليلة دي، ممكن تحجز تذكرتك من خلال موقع تذكرتي، اعرف
تفاصيل أكثر عن الحفل من هنا.
دي جي فابريك هـ يكون
موجود في ملوك بار اللي في الدقي يومين وراء بعض الخميس والجمعة، ممكن تتصل علشان
تحجز من المكان.
غَير الموود واحضر عرض فرقة
أضواء النوبة في قاعة الطنبورة الموجودة بحي عابدين واستمتع بالموسيقى
النوبية التقليدية في وسط القاهرة.
يحيى خليل وفرقته هـ يكونوا في
دار الأوبرا على المسرح الصغير يوم الجمعة 16 مارس، الحفلة هـ تبدأ الساعة 8
والتذاكر من شباك الحجز مباشرة.
وعلى مسرح الجمهورية بوسط البلد التابع لدار الأوبرا
المصرية، هـ تقدم الفنانة أحلام مطربة الموسيقى
العربية بمصاحبة فرقتها حفل غنائي بمصاحبة مجموعة من أفضل مطربين كورال
الموسيقى العربية بدار الأوبرا، لو بـ تحب الطرب الأصيل ما تفوتش الحفلة دي.، يا إما تحضر حفل ثاني هـ تحييه الفرقة القومية العربية للموسيقى على المسرح الكبير
في الأوبرا في نفس اليوم.
وفي مكتبة «الكتب خان» بالمعادي هـ يكون فيه حفل أغاني
أكوستك لشادي أحمد وطارق ضياء وهـ يقدموا
أغاني ألبومهم الجديد الساعة 7:30 مساءً، والدخول مجانًا.
ويوم السبت هـ تكون فعاليات مهرجان الجاز لسه مستمرة في
الأماكن اللي قولنا عليها، وممكن تحضر واحد من المعارض اللي كانت مستمرة من أول
الأسبوع زي معرض «فتاة الدبابة» في جاليري مصر اللي تكلمنا عنه الأسبوع اللي فات أو معرض الفنانة كاثرين باخوم في جاليري سفر خان بعنوان
“La Belle Époque“ واستمتع باللوحات الزيتية اللي بـ تصور الفنون الشرقية
الكلاسيكية.
ولهواة العروض السينمائية العالمية ممكن تحضر ليلة السينما بالمركز الثقافي الفرنسي بالمنيرة النهاردة،
وهـ يتم عرض فيلمين بدءًا من الساعة 6 مساءً.
فيه محاضرة مهمة كمان الليلة دي في قاعة الكلمة بساقية
الصاوي بعنوان “معًا نعيد اللغة العربية للحياة”
ضمن سلسلة محاضرات بعنوان ثورة على الأخطاء اللغوية، للمهتمين فقط طبعًا.
همم؟ قررتم هـ تعملوا إيه؟ عمومًا فيه حاجات ثانية إحنا
مش كاتبين عنها هنا ممكن تلاقوها على أجندة كايرو 360 وتعجبكم، ويك إند سعيد..
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
