The Definitive Guide to Living in the Capital , Cairo , Egypt

كتبنا من فترة مقال عن أماكن ممكن تروح تتفرج فيها على فيلم غير السينما، واتكلمنا عن الفرق بين أفلام الأماكن دي -واللي أغلبها بتبقى مساحات فنية- والأفلام التجارية اللي بتقدمها السينمات العادية. فمبدأيًا لو أنت ما لكش في التجاري والمقاولات شوف المقال ده هيعجبك. أما لو أنت ما لكش في جو أفلام المهرجانات وكلاسيكيات الزمن الجميل خليك عندك، هنجمعلك هنا مجموعة من أهم السينمات الموجودة في بقاع القاهرة المختلفة:

 

ستارزسينما:

والموجودة في سيتي ستارز مول، واللي قدرت في وقت قليل أنها تحقق نجاح كبير، بتتميز مجموعة السينمات دي بجودة النسخ وتنوع الأفلام الموجودة لأن شاشات العرض كثيرة فيها. مجموعة السينمات متقسمة كالآتي:

 ستارز سينما العادية، وفيها أكثر عدد من الأفلام لأن فيها حوالي 14 شاشة عرض وسعر التذكرة 40 جنيه. طبعًا هي مش بفخامة كراسي جولدن ديلوكس واللي سعر تذكرتها أغلى 50 جنيه، واللي لها 5 شاشات عرض.

أما الأخيرة، فهي الـ VIP، وهي طبعًا الأفخم والأغلى؛ تقعد فيها براحتك على الـ Lazy Boy وبينك وبين اللي جنبك مساحة بعكس أي سينما ثانية –ده غير أنك ممكن تأكل فيها اللي نفسك فيه. عادة الـ VIP  بيبقى فيها أحدث وأقوى الأفلام اللي موجودة على الساحة في وقتها، سعر التذكرة 100 جنيه.

 

سينما جالاكسي:

بالرغم من أن فيه سينمات ثانية كثير ممكن تكون أحدث من سينما جالاكسي، إلا أن اللي جابها هنا هو اعتراف كاتب المقال بدورها اللي قامت بيه في وقت كان مستوى الخدمة في السينمات الثانية بدأ في الانحدار. وكانت جالاكسي المنيل في فترة من الفترات هي السينما اللي تتراح بين المحاضرات في السريع، آخر يوم امتحانات، أو حتى وأنت زهقان من المدرسة ومحتاج تغير جو.

عدد شاشات العرض فيها 6، وبتتنوع أفلامها ما بين العربي والأجنبي. أسعار التذاكر كالآتي، حفلات 10:30 وواحدة بـ 40 جنيه، أما الحفلات من 3:30 لـ 12:30 فبـ 50 جنيه.

 

سينما أوديون:

من السينمات اللي القائمين عليها يستحقوا كل الاحترام، لأنهم قدروا يحققوا المعادلة الصعبة بتقديم الأفلام التجارية والأفلام المهمة اللي الربح التجاري مش الهدف الأساسي منها؛ ففيه سينما زاوية –واللي موجودة في المقال اللي قلنا لك عليه فوق- واللي بتعرض كل أسبوعين أي فيلم حقق نجاح فني على المستوى المهرجانات، وفيه شاشتين عرض مخصصين للأفلام التجارية في العادي –عادة بيبقى فيلم أجنبي والثاني عربي. أما في المواسم، فكل شاشات العرض بتبقى مخصصة للعربي بس.

أسعار التذاكر كالآتي، حفلات 10:30 وواحدة 20 جنيه، أما الحفلات المسائية 3 لـ 12 فسعرها 25 جنيه، وده سعر معقول جدًا.

 

سينما بلازا:

ما ينفعش أننا نتكلم عن السينمات الموجودة في القاهرة وما نجيبش سيرة سينمات أمريكانا بلازا. اللي فيها طبعًا سينما IMax، واللي بتتميز بشاشتها الضخمة اللي بتخلي دخول السينما تجربة مختلفة تمامًا –خصوصًا لو الفيلم 3D. سعر التذكرة للمواعيد 10:15 و1:45 50 جنيه، أما بقية المواعيد فـ 80 جنيه.

فيه برضه Cinecomfort، وبيعرض فيها فيلمين، وسعر التذكرة 60 جنيه. أما سينما أمريكانا بلازا العادية، فعدد الأفلام كبير ما بين العربي والأجنبي – عادة أكثر من 10 أفلام – وأسعار التذاكر 30 جنيه في حفلات 10:15 وواحدة، وبقية الحفلات 50 جنيه.  

 

فاميلي سينما:

من السينمات المفضلة لعشاق السينما من أهل المعادي، شاشات عرضها مش كثير، ولكن القائمين على السينما بيحاولوا قدر الأمكان أنهم يجمعوا أكبر قدر من الأفلام الجديدة ويوزعوا عرضها على مواعيد مختلفة. فاميلي سينما بتحرص أنها تجيب كل الأفلام الأجنبية اللي بتنزل جديد، بجانب عدد من الأفلام المصرية الموجودة في الساحة.

أسعار التذاكر كالآتي: 10:30 بـ 25 جنيه، 1:00 بـ 30 جنيه وبقية الحفلات بـ 40 جنيه.

 

سينما رنيسانس نايل سيتي:   

 واللي موجودة في نايل تاورز على كورنيش النيل، وهي من السينمات المشهورة جدًا وكل أهل المهندسين اللي مش هيضربوا المشوار لأكتوبر بيروحوا هناك. سينما نايل سيتي بتقدم عدد كويس من الأفلام المصرية والأجنبية، وهي متجددة كل أسبوع.

أسعار التذاكر كالآتي 30 جنيه للحفلتين الصباحيتين، وبقية الحفلات سعرها 45 جنيه.

لازم نقول هنا أنها تابعة لمجموعة سينمات رنيسانس واللي لها فروع كثيرة جدًا في كل حتة في القاهرة.

 

بوينت 90:

من أحدث السينمات اللي ظهرت على الساحة، واللي خدمت محبي السينما في التجمع الخامس. من السينمات اللي بيوصلها نسخة الفيلم بدري بعكس سينمات ثانية كثيرة الفيلم الجديد بينزل فيها متأخر. وزي دور عرض كثير فيها بعض الأفلام اللي بتعرض بأولوية الحجز؛ يعني فيلمين بيشتركوا في شاشة عرض واحدة، واللي الطلب يزيد عليه في يوم يكون هو المعروض.

أسعار التذاكر كالآتي حفلتين الصبح 40 جنيه، وبقية الحفلات 60 جنيه.

 

كوزموس:

لو مالكش في الأجنبي خالص، عليك وعلى كوزموس؛ لأنها من السينمات اللي بتقدم عربي بس. وعادة بتعرض خمس أفلام وبيفضلوا موجودين لحد ما ينزل جديد غيرهم؛ يعني لو فاتك فيلم كنت عايز تروحه وما بقاش موجود في السينمات الثانية تقدر تلحقه هناك.

أحلى حاجة أن أسعار التذاكر في الحنين؛ يعني حفلة 10 وواحدة بـ 15 جنيه، حفلات 3 – 9 بـ 25 جنيه، أما حفلة الساعة 12 صباحًا فهي بـ 20 جنيه.

 

سينما جولف سيتي:

ضميناها في المقال مخصوص لأهالي مدينة العبور الكرام، وهي من السينمات اللي بتضم حوالي 10 أفلام ما بين عربي وأجنبي، فأكيد هتلاقي حاجة تعجبك فيهم. وما تقلقش هتلاقي كل أسبوع أهم فيلم أجنبي جديد موجود فيها.

سعر التذكرة هناك في حفلات 10 وواحدة 25 جنيه، وبقية الحفلات سعر التذكرة بـ 35 جنيه.

 

ما تنساش تاخد بصة على أحد الأفلام وأماكن ومواعيد عرضها من هنا.