دليل كايرو 360 لعشرة أماكن غير السينما ممكن تتفرج فيها على أفلام - أفلام Feature - كايرو 360
 







دليل كايرو 360 لعشرة أماكن غير السينما ممكن تتفرج فيها على أفلام
دليل كايرو 360 لعشرة أماكن غير السينما ممكن تتفرج فيها على أفلام
اصدرت في: 07/03/2016

بالرغم من أن دور العرض السينمائي في انتشار مستمر في أنحاء القاهرة وكل أسبوع فيه مش أقل من 4 أفلام جديدة نازلة، إلا أن معظمها بتعتمد على أفلام هوليوود الناجحة تجاريًا، وأحيانًا أفلام بوليوود لجذب الناس اللي بتحب الأفلام الهندية، اللي غاوي سينما بجد هيعرف أنها مش هوليوود أو بوليوود بس، وأن فيه دول كثيرة جدًا بتقدم سينما مضمونها أفضل بكثير من الأفلام المعتادة.

 وهنا تيجي ميزة الأماكن اللي هنقدمها هنا في المقال؛ أنها مش بـ تركز على الأفلام الأمريكية بس، ولكن بتهتم أنها تعرض الأفلام اللي حققت إنجازات على مستوى المهرجانات العالمية، ده غير أنها بعكس دور العرض العادية بتقدم كلاسيكيات السينما، وطبعًا ما ننساش ميزة مهمة وهي أن سعر التذكرة بـ يكون أقل من سعر تذكرة دور العرض العادية، وأحيانًا بيبقى معاها مشروب.

 

رووم آرت سبيس – Room Art Space:

رووم آرت سبيس من الأماكن اللي قدرت في وقت قليل أنها تجذب محبي الفنون؛ فبجانب عدد الحفلات الموسيقية الكبير اللي بـ تقدم فيها فرق شابة هناك، المكان كل شهر بيكون مجهز مواعيد عروض الأفلام، واللي غالبًا بيجمعها عامل مشترك؛ على سبيل المثال قدموا الشهر اللى فات مجموعة أفلام ألمانية تحت عنوان "برلين في عيون صناع الأفلام"، وحتى لو عامل اللغة صعب يخليك تفهم الفيلم، ما تقلقش لأنها بتبقى مصحوبة بترجمة للإنجليزية.

سعر التذكرة، واللي بـ يبقى الحد الأدنى للطلبات في نفس الوقت هو 25 جنيه، علشان تعرف إيه الجديد عندهم تابع صفحتهم على الفيسبوك.

 

بلكون لاونج - Balcon Lounge:

أهل مصر الجديدة أكيد هيعرفوا بلكون لاونج، واللي عادة بيعرض الأفلام الحديثة اللي شاركت مؤخرًا في المهرجانات المختلفة واللي عملت صدى عند النقاد أيًا كانت جنسيتها، من ضمن المجموعة اللي بتعرض عندهم في الفترة الأخيرة شاركت في مهرجان القاهرة السينمائي، سعر التذكرة 20 جنيه، ويفضل أنك تتصل بهم علشان تحجز مكانك.

تابع جدول عروضهم من هنا.

 

مركز سينما الحضارة:

بالرغم من أنه مش بشهرة الأسماء الثانية، إلا أن مركز سينما الحضارة اللي موجود خلف المسرح الكبير بدار الأوبرا المصرية بيقدم كل فترة مجموعة من الأفلام اللي بتختلف جدًا عن الأماكن الثانية، فمعظم الأفلام بتبقى تسجيلية عن شخصيات شهيرة، أو مناسبات قومية ودينية (ذكرى حرب أكتوبر أو المولد النبوي مثلُا) أو تجارب سينمائية لشباب المبدعين.

أغلب العروض بـ تبقى مجانية وأحيانًا بـ يصاحبها ندوة أو حلقة نقاشية.

 

المعهد الهولندي الفلمنكي - Netherlands-Flemish Institute in Cairo:

المعهد الهولندي الفلمنكي في الزمالك بيقدم كل يوم أحد فيلم بميعاد ثابت وهو الساعة 7:30 مساءً (لاحظ أن الدخول من الساعة 7)، وعادة بيختار موضوع عام موحد لمجموعة الأفلام اللي بتقدم على مدار الشهر، وأغلبيتها بتكون موضوعات لها علاقة بالقضايا الاجتماعية في العالم، ولكن ده مش معناه أنها كلها أفلام تسجيلية ووثائقية بس؛ المعهد بيعرض أفلام درامية في بعض الأوقات ولكن أغلبية محتواها بيكون جاد، تقدر تعرف جدول العروض من موقعهم الإلكتروني أو صفحة الفيسبوك.

الدعوة عامة، ولكن القاعة بتتقفل باكتمال العدد، فحاول تروح بدري على قد ما تقدر.

 

المركز الثقافي الإيطالي:

لو أنت غاوي السينما الإيطالية الكلاسيكية أو المعاصرة، المركز الثقافي الإيطالي في الزمالك هيكون مكانك المفضل؛ لأنه بطبيعة الحال بيعرض كوكتيل مميز من الأفلام السينمائية الإيطالية ببلاش، وخصوصًا الأفلام الكوميدية وأحيانًا بيجمعوا أفلام لها عامل مشترك زي معظم الأماكن اللي ذكرناها.

لازم نقول لكم أن المركز بيعرض أفلامه أحيانًا في أماكن ثانية زي مجموعة "رحلة مع نجم" واللي مقامة في زاوية.

العيب الوحيد في المكان ده أن الدخول لازم يكون بحجز مسبق، ده غير أن صفحة الفيسبوك الخاصة بالمركز باللغة الإيطالية، فأحسن لك أنك تشوف موقعهم اللي باللغة العربية لأنه مفيد ومتجدد.

 

مركز دال للأبحاث والإنتاج الإعلامي – DAAL Research and Media:

بجانب حفلات توقيع الكتب والمناقشات والفعاليات الجادة اللي بيقدمها المكان، دال بيقدم كل يوم أربعاء فيلم في سينما دال، اختيارات الأفلام مميزة وما بتقتصرش على السينما العالمية بس، ده كمان بتقدم أفلام عربية بجميع أنواعها سواء روائية أو تسجيلية.

بجانب أن الدعوة عامة لجميع الأفلام اللي بتبدأ الساعة 6، مركز دال مخصص صفحة فيسبوك لعرض برنامج سينما دال.

 

ماجنوليا ليفز أوف آرت – Magnolia Leaves of Art:

ماجنوليا من الأماكن اللي حققت نجاح كبير في وقت قليل، بدأ الأول بمكان صغير في شارع متفرع من شارع البرازيل وبعدها نقل لمكان أوسع في شارع محمد أنيس لأن الأول ما كانش بيستوعب الأنشطة المختلفة اللي المكان بيقدمها. المكان الجديد فيه قاعة مخصصة للسينما وبالتالي الفرجة هتكون أحسن.

اختيارات ماجنوليا في الأفلام مالهاش اتجاه أو جنسية محددة، المهم أنها تكون أفلام جيدة ومهمة، ولو الفيلم محقق نجاح أكبر من المعتاد، ماجنوليا بيقدم كذا عرض للفيلم في نفس اليوم، غالبًا بيبقى العرض الأول الساعة 3 والثاني الساعة 7 مساءً.

سعر التذكرة 20 جنيه وهو الحد الأدنى للطلبات هناك، تابع صفحتهم من هنا.

 

علبة ألوان - 3elbet Alwan:

من الأماكن اللي لها روح خاصة جدًا، صحيح اتجاههم بيبقى للحفلات الموسيقية أكثر من عرض الأفلام، إلا أن علبة ألوان فيه ميزة مهمة وهي أنه أكثر الأماكن عرضًا للأفلام العربي المهمة واللي مالهاش صدى تجاري، زي فيلم المخرج أمير رمسيس "عن يهود مصر"، واللي بيتكلم عن فترة مهمة و"ملخبطة" في تاريخ مصر.

سعر التذكرة وهو الحد الأدنى للطلبات 25 جنيه، وصفحة الفيسبوك عليها كل الجديد اللي بـ يقدموه.

 

صوفي - Sufi:

صوفي من الأماكن المشهورة جدًا في الزمالك، واللي محبينه بيروحوا له من كل حتة في القاهرة، صوفي يعتبر حاليًا من الأماكن اللي مهتمة باليوجا والرياضات الروحانية، ولكن ده ما يمنعش أنه كل فترة والثانية بيقدم فيلم.

وبالرغم من قلة عروض الأفلام في صوفي إحنا اختارناه وسط القائمة لأنه بيقدم نوعية خاصة جدًا من الأفلام، وهي الأفلام الكلاسيكية وخصوصًا أفلام العبقري تشارلي تشابلن، واللي لها طابع خاص جدًا مختلف عن أي أفلام ثانية، فلو أنت من محبي تشارلي تشابلن أكيد هـ تلاقي صوفي بـ يعرض له فيلم مرة واحدة على الأقل في الشهر.

بالرغم من أنهم ما بيكتبوش سعر تذكرة الدخول في الإيفينت، إلا أنه في الأغلب بيكون سعر الحد الأدنى للطلبات.

 

زاوية – Zawya:

بالرغم من أن زاوية ممكن نعتبرها دار عرض سينمائي، إلا أنها متميزة عن دور العرض التجارية بنوعية أفلامها؛ لأن الأفلام بتبقى مش بس أفلام قيمة من حيث المضمون والصناعة، دي كمان بتبقى إصدار حديث، عادة الأفلام بتفضل لمدة أسبوعين في زاوية مع وجود عرض أول لفيلم –غالبًا بيكون هو الاختيار القادم- مرة واحدة وسط الأسبوع.

ميزة ثانية لزاوية أن لها حفلات ثابتة زي السينمات العادية (1، 3، 5، 7:30 و10 مساءً) وبالتالي لو فيلم عاجبك بجد هـ تلاقي وقت تروحه بعكس الأماكن الثانية اللي بيبقى العرض فيها لمدة يوم واحد في وقت محدد، الأفلام عادة مترجمة للغة العربية بعكس أماكن كثير ترجمتها بتختلف حسب نسخة الفيلم ولغته الأصلية.

أسعار التذاكر 20 جنيه لحفلة الساعة واحدة، و25 جنيه لبقية الحفلات.

التعليقات
تصويت

Loading...

اكسب! عشاء لفردين في المطعم الياباني توري
اكسب! عشاء لفردين في المطعم الياباني توري
عن الكاتب
دينا مختار
حرر بواسطة:
دينا مختار
تاريخ النشر:
07/03/2016
منسق تحريري.. الشخص اللى تلاقيه قاعد لوحده على القهوة الصبح بدري بـ يتفرج على الخلق، سيب لها قلم وورقة فاضية هـ ترجع تلاقيها إما كاتبة قصة قصيرة أو راسمة باب شعبي قديم، تطلعها من وسط مليون بلبسها المنقوش فى منقوش.