The Definitive Guide to Living in the Capital , Cairo , Egypt

الحياة في كايرو

دليل كايرو 360 لكل اللي محتاج تعرفه عن مول العرب

دليل كايرو 360 لكل اللي محتاج تعرفه عن مول العرب
بواسطة
Angie El Batrawy

المول الناجح هو اللي بيضم تحت سقفه كل شيء تحتاجه الأسرة، من ترفيه وتسوق وأماكن للأكل.. إلخ، ونقدر نقول أن كل ده متوفر بنجاح في مول العرب – Mall of Arabia.

المول بيملكه مجموعة الحكير، موجود بعد ميدان جهينة فى مدينة 6 أكتوبر وله 23 مدخل، بعضهم بيطل على الشارع الرئيسي أمام جامعة MUST وبعضهم ناحية الطريق المؤدي لنادي الصيد المصري، كان عبارة عن دور واحد في البداية، ومن فترة بقى فيه دور أرضى كمان، وحاليًا بيتم عمل توسعات علشان يتسع لعدد أكبر من المحلات، فيه ساحة جراج للعربيات مجانية، وتصميم المبنى كله على شكل دور واحد، بينقلك من مكان للتاني –لو مش قادر تمشي- عربيات شيك من غير سقف وطرازها قديم، وكمان الأسانسيرات متاحة علشان لو معاك عربية طفل ومش قادر تنزل بها السلم، وفي النص بين صفين المحلات هتلاقى Booths صغيرة بتبيع منتجات مختلفة زي: إمتنان، أو Candy أو مكسرات أو العطور زي “أنفاسك عطور” و”ماء الذهب”، وفضة، وشنط وجزم وطرح للمحجبات وغيرها كتير.

زي ما قلنا مول العرب مناسب للعائلات، يقدر كل الأفراد يقضوا فيه يوم كامل يشمل الأكل والترفيه، والتسوق، هنستعرض معاكم إيه الأماكن والأنشطة المناسبة لكم بتفاصيلها:

أماكن لعب الأطفال:

علشان تبقى تجربة التسوق مريحة وممتعة، بعض الآباء بيفضلوا أنهم يسيبوا أولادهم في ملاهي المول خاصة لو الطفل سنه فوق 3 سنوات وممكن يزن أو يزهق، فيه كذا مكان في المول هما:

البيلى بييز Billy Beez: مدينة ألعاب كبيرة للأطفال (كلها Soft games) من سن 1: 12 سنة في الدور العلوي، قيمة التذكرة 140 جنيه لليوم كله ومتاح أن يدخل مع الطفل فرد واحد فقط مجانًا، أي فرد زيادة بيدفع 50 جنيه، بس خلي بالك التذكرة One entry يعني لو الطفل خرج وعاوز يرجع تاني بيدفع تذكرة جديدة، شغالين من 10 صباحًا: 11 مساءً، ممنوع تجيب أكل من بره، فيه كافيتريا هناك، والجميل في الموضوع أن فيه تليفون مجانًا يستخدمه الأطفال لو حابين يكلموا حد ييجي ياخدهم أو للطوارئ.

Spark’s Egypt: مكانها في الدور الأرضي، عبارة عن ملاهى على مساحة كبيرة وفيها Video games، نظامها أنك بتشتري كارت بيجمع لك نقط، يعني مثلاً الكارت اللي بـ 125.50 فيه كريدت 150 جنيه، وعندك كذا قيمة كارت لحد 581.50 فيها 1000 جنيه، وكل ما تلعب لعبة بيتخصم من الكارت بتاعك، ولما بيخلص بتعيد شحنه تانى، كل ما تلعب لعبة (ماعدا الـ Video games) بتاخد نقط، وعلشان تاخد هدية لعبة من المكان لازم توصل لـ 70 نقطة ومش شرط يكونوا من زيارة واحدة، المكان مناسب للأطفال من 3 سنين.

Shoot IFC: برضه في الدور الأرضي، أمام Spark’s مباشرة، عبارة عن ملاعب كرة قدم كتيرة وبأحجام مختلفة، طبعًا المكان ده مناسب أكتر للأطفال الولاد من سن 5: 15 سنة، الفرد في الساعة بـ 90 جنيه، وفي النص ساعة بـ 60 جنيه، والتلت ساعة بـ 50 جنيه.

لو أنت عندك طفل سنه لسه مش مناسب لأماكن اللعب دي، فيه عربيات صغيرة شكلها لطيف بأيد طويلة بتتأجر علشان الناس اللي ما عندهاش Stroller يحطوا فيه ولادهم علشان ما يفضلوش شايلينهم طوال الوقت.

السينما:

موجودة عند بوابة 22، سينما Galaxy Cineplex فيها 13 شاشة عرض بتعرض أحدث الأفلام، ممكن تتابعوها من خلال قسم السينما على الموقع، أول عرض الساعة 10:30 صباحًا، يليها 1:30 ظهرًا، ثم 3:30 ,6:30 , 9:30 وشغالين لحد 12:30 مساءً.

أماكن الأكل:

طبعًا بعد اللف والدوران لازم البطن هتصوصو، مول العرب بيقدم اختيارات متنوعة وكذا مكان داخل المبنى وخارجه، فيه منطقة الفوود كورت ودي داخل المبنى، وفيه الكافيهات والمطاعم اللي بتطل على النافورة الراقصة، وفيه كمان بعض المطاعم فيها جزء بيطل على النافورة وجزء داخلي جوه المول وأنت لك حرية الاختيار.

بالنسبة للفوود كورت المطاعم واخدة شكل مربع ضلعه ناقص وفي النص أماكن الجلوس، والجميل أنه شامل لكل أنواع الأطباق والمطابخ: المصري زي شقرة تو جو، العمدة، مؤمن، بريجو، وكوك دوور وكيلو كباب وكيلو جمبري، والآسيوي زي باندا هاوس وAsian corner، حتى الإنجليزية زي London Fish & Chips وNew York Fries، والمطاعم العالمية طبعًا زي ماكدونالدز، وكنتاكي، وبرجر كينج، وهاردييز، وبيتزا هت، ده غير أن وسط أماكن الجلوس Booths بتاعة عصاير فريش.

أما المطاعم اللي بتطل على النافورة الراقصة ودي بتقدم عرض موسيقي كل فترة وأنت بتستمتع بأكلك في الهواء الطلق منها: مزاج، وقهوة بيروت وتشيليز وكافيه سوبريم، وفيه اللي منهم زي ما قلنا لهم قعدة جوه وبره المول زي Mori Sushi، وCasper & Gambini’s، وPaul Bakery.

الديكور ومستلزمات المنزل:

من الحاجات اللي بتميز مول العرب عن أى مول تاني أن عنده قسم في المول على مساحة كبيرة اسمه Furniture Mall، تحس أنه مول صغير جوه مول أكبر، مقسم على 3 أدوار، هتلاقى فيه شركات كبيرة في عالم الديكور ومستلزمات البيت والأنتيكات زي: Designy، مظلوم للسيراميك، زهران، Print Shop، Hanimex، وComfort وHigh Point وغيرها كتير هتعرف هما موجودين فين بسهولة لأنهم كاتبين على كل دور أسماء المحلات.

الكمبيوتر والإلكترونيات Vs. المكتبات:

لو أنت من عشاق الإلكترونيات وبتحب تتابع كل جديد في إصدارات المحمول الجديدة واللابتوبات هتتبسط جدًا في مول العرب لأنك هتلاقي كذا محل هيشبعوا فضولك زي: Tradeline وComputer Shop وMobile Shop وB-Tech و2B، على عكس الناس اللي بتحب تقرأ أكتر ودودة كتب مش هتلاقوا في المول غير مكتبة بكير (ودي متخصصة في الـ Stationery أكتر من الكتب) وBooth صغير لمكتبة “أ” في الوسط في ممرات المول، واللي بيرضي الطرفين هنا هو Virgin Megastore اللي هتلاقي فيه أحدث إصدارات الكتب والإلكترونيات وشاشات التليفزيون ولعب الأطفال وغيرها.

ماكينات الصرف الآلى والبنوك:

أغلب الناس اللي بتروح مول العرب عارفة أن عند مدخل كل باب فيه ماكينات صرف آلي لكذا بنك، بس فيه ناس كتير ما تعرفش أن فيه فروع لبنوك زي QNB وBarclay’s وبنك الاستثمار العربي مستخبيين في الدور الأرضي ومافيش إعلان عنهم في أي حتة في المول، الغريب بقى أن جنب البنوك دي فيه مركز للعناية بالجلد والبشرة اسمه “المركز الطبي للصحة الجلدية” مافيش إعلان عنه برضه في أي مكان وما سمعناش عنه قبل كده وده يفسر هو ليه كان هادي وفاضي لما مرينا من جنبه!

أهم حاجة.. التسوق:

نظرًا للمساحة الضخمة اللي بيشغلها المول هتلاقي مئات المحلات المناسبة لكل أفراد الأسرة.

للسيدات: من ماركات الملابس العالمية هيلاقوا Accessorize، وMango وWomen’s secret وStradivarius والماركات المحلية زى Carina وClue وBella Donna، وبالنسبة للماكياج والعطور فيه محلات بريق وFaces وMazaya.

للرجال: برضه فيه ماركات عالمية ومحلية، العالمية زي Timberland وTommy Helfiger وLevi’s وNaga Homme وTown Team والمحلية منها Concrete وSeventy.

للأطفال: المول كمان مهتم بالفاشون الخاص بالأطفال أولاد وبنات، هتلاقي هناك محلات The Children’s place، Sergent Major، Okaidi، ومن محلات اللعب ومستلزمات الام والطفل Hedeya وToy World وBarbie & Disney.

محلات مناسبة للجنسين: ودي كتيرة جدًا منها العالمي Pull & Bear وCenterpoint وCalliope وBershka وZara وVero Moda وRavin وTerranova وJack & Jones وLC Waikiki ومن المحلي Ravin وNAS، وبعض المحلات دي فيها أقسام للأطفال، ده غير محلات النظارات خاصة نظارات الشمس زي Happy Vision، Blue Eyes، Alpha Optical، وأخيرًا محلات الرياضة هتلاقوا Intersport وAdidas.

وأخيرًا من الحاجات اللي بتميز مول العرب كمان الميجا ماركت سبينيس – Spinney’s اللي فيه كل حاجة من أول التليفزيونات والأجهزة المنزلية والإلكترونية لحد مستلزمات البيت والأكل وأمامه فيه الـ Customer Service بتاعة شركات المحمول التلاتة لو عاوز تستفسر عن شيء أو تدفع فاتورة التليفون.

كمان زوار المكان مش محتاجين يخرجوا بره المول وجود الصيدليات زي صيدلية النادي (الدور العلوي) والعزبي (الدور الأرضي)، وللي عاوز يشتري عربية جديدة أو حابب يتابع آخر الإصدارات في السوق من العربيات ممكن يزور معرض الطارق للسيارات هناك.

فسحة سعيدة!

مقترح