The Definitive Guide to Living in the Capital , Cairo , Egypt

الحياة في كايرو -
مقترح

رمضان في القاهرة 2015: أجمد الخيام الرمضانية في العاصمة

رمضان في القاهرة 2015: أجمد الخيام الرمضانية في العاصمة
بواسطة
Habiba Salama

رمضان فيه تعب شديد وصيام من الفجر للمغرب، ومعاه بـ تيجي فرحة الاستمتاع بأول وجبة في اليوم مع أصحابك وحبايبك، غالبًا الكلام ده بـ يكون وأنت في بيتك ومستريح، بس النهارده كلامنا موجه للناس اللي نفسها في الأكلات الرمضانية التقليدية وسط أجواء فخمة نوعًا ما، ويا سلام لو معاها شيشة وإطلالة على النيل، علشان كده جمعنا لكم شوية خيام رمضانية تقدر تحقق طلباتكم.

 

وحوي لاونج في لو باشا 1901

الخيمة الرمضانية السنوية بـ تقدم كل حاجة ممكن تحلم بها: شيشة، طاولة ولعب ورق، عدد من ألعاب الطاولة مع منظر النيل الوهمي اللي كلنا بـ نتظاهر أنه مش مهم، بس هو مهم، سمعة مركب الباشا سابقاه والسبب أكلهم الكويس حتى في رمضان، فإيه ثاني ممكن تتمناه؟ للحجز، اتصل بـ 01002947111.

 

باب النيل في فيرمونت نايل سيتي

عندك يا سيدي طاولتك، ألعاب الورق، شطرنجك وتليفزيون خاص بكل ترابيزة، طبعًا كل اللي فات حوار والإطلالة الخرافية من التراس وأنت بـ تتفرج على القاهرة حوار ثاني خالص. الأكل حلو، الشيشة أحلى، والناس اللي حولك هم أحسن حاجة في الموضوع، كل اللي عليك هو الحجز عن طريق 0224619494.

 

فوازير في لو ميريديان المطار

باعتباره أحد أجدد الفنادق في القاهرة، لو ميريديان مطار القاهرة لسه محتفظ بشكل الفندق الجديد وبـ يحتفل بأول رمضان بشكله الأنيق مع "فوازير" الخيمة الرمضانية المستوحاة من فوازير التسعينيات –زي فطوطة مثلاً– مع لمسة ترفيهية حديثة زي ألعاب Wii، إكس بوكس، بلاي ستيشن وFoosball. كمان كل جمعة بـ يستضيفوا فرقة مصرية كبيرة، للحجز اتصل بـ 0222659600.

 

رمضانا في ريفرسايد

صحيح المكان واخد الطابع الرسمي شوية، بس المتعة هي هي، وقدر طارق نور بخيمته "رمضانا" يقدم مكان مختلف، بمكانهم السنة دي في ريفرسايد، الموضوع كله معمول علشان زوار المكان يستمتعوا بأجواء فخمة مالهاش مثيل، تقدر تتفرج على جمال المكان وبساطته وأنت بـ تشوف المشاهير، علشان المكان مليان بهم، اتصل بـ 01212801290 للحجز.

 

سي عمر في فيرمونت هليوبوليس

بصفتها واحدة من أشهر الخيام الرمضانية في القاهرة، أنت بـ تبقى متأكد أن الخيمة دي تحديدًا مش هـ تحبطك، كل حاجة في "سي عمر" كبيرة، مكان كبير، أكل كبير، عروض ترفيه كبيرة، من الآخر كل حاجة معمولة بسخاء، اطلع أنت وصحابك أو عائلتك على المبنى الزجاجي الفضائي الكبير المسمى فيرمونت هليوبوليس & تاورز واستمتع بسهرة ما حصلتش، للحجز اتصل بـ 16989 أو 01011111061.

 

جوز ولوز في كافاليني

كافاليني بـ يجمع بين شكل أماكن السهر التقليدية مع أجواء رمضان اللي بـ نحبها في مصر في مكان واحد هو "جوز ولوز"، مع كافاليني هليوبوليس كل توقعاتك في محلها وهـ تكون أكبر وأكثر لمعانًا بمناسبة رمضان، علشان تحجز ترابيزة لك ولمجموعتك اتصل بـ 01061191100 أو 01060616767.

 

ولاد الذوات في سوفيتيل الجزيرة

معانا واحد من أرقى المطاعم الشرقية في العاصمة وهو "ولاد الذوات" الشهير بأكله الحلو في سوفيتيل، ولو أضفت له العروض الترفيهية وإطلالته الرائعة على النيل في مكان مميز جدًا من الزمالك، تقدر تقول بكل ثقة أنه المكان المناسب لسهرة رمضانية جامدة، علشان تعيش رمضان بشكل مختلف اتصل بـ 01000002192.

 

سمعة باشا في ماريوت القاهرة

زمان كان قصر واحد من الباشوات، ومن هنا أنت متأكد أن خيمة ماريوت من اسمها هـ تقدم لك أنت واللي معاك تجربة مش أقل من الخدمة المقدمة لسمعة باشا نفسه. هـ يكون في انتظارك أكل وسط واحدة من أجمل القعدات المكشوفة في القاهرة وهـ يكون هناك كمان محطات جاهزة لتقديم مجموعة من الأكلات المصرية المحبوبة، الحقيقة هي رحلة وسط الذكريات والتاريخ، علشان تحجز مكانك في الرحلة، اتصل بـ 0227283000.

 

ليمونادا في ليمون تري & كو

على أعلى نقطة من مركب إمبريال، ليمونادا التابع لليمون تري & كو بـ يقدم سهرة مودرن في مكان مودرن، اللاونج البسيط دخل في أجواء رمضان بشكل لطيف بتقديمه لأكل كويس وشيشة حلوة وإطلالة هايلة، واضف كمان ميزة أنك هـ تقضي سهرتك في واحد من أروش الأماكن في القاهرة، ممكن تحجز من خلال رقم 01002223999.

 

لانترنز (Lanterns) في كلوب هاوس أب تاون كايرو

ناس كثير بـ تشوف أب تاون كايرو مكان من عالم ثاني، ومافيش وقت أنسب تروح فيه للقاهرة الجديدة من رمضان، أنت على موعد هناك مع مناظر رائعة للقاهرة بحالها وسط الخضرة والهواء المنعش مع الأكل والشيشة الحلوة، الفرق الموسيقية بـ تولع الأجواء في الخيمة في وسط الأسبوع، وطبعًا الويك إند بـ يقدموا فيه أشهر الفرق الموسيقية المصرية، اتصلوا بـ 16129 أو 01283557000.

 

لا جورمانديز في فور سيزونز فيرست ريزيدانس

لا جورمانديز رجع من ثاني للفور سيزونز أكبر بكثير من زمان، كلمة كبير هي الكلمة المناسبة لوصف كل حاجة هناك، عروض ترفيهية يومية، سحب على جوائز، مع بوفيه إفطار (320 جنيه) ومنيو آلا كارت أنيقة بـ يضمنوا لك تجربة رمضانية مثيرة، أه.. نسينا نقول لكم أن فيه مغنيين مشهورين بـ يغنوا هناك أيام الخميس، للحجز اتصل بـ 0235672015.

 

ذا لاونج في إنتركونتيننتال سيتي ستارز

إنتركونتيننتال سيتي ستارز معروف من اسمه المرتبط بجاره المول الشهير سيتي ستارز، والسنة دي في رمضان بـ يقدم خيمته "ذا لاونج – The Lounge"، من اسم الخيمة تقدر تفهم إيه مستنيك هناك؛ مكان مودرن مريح بـ يقدم بوفيه سحور لبناني مع فرق غنائية ودي جي علشان يقدم تجربة ما تتنسيش. للحجز اتصل بـ 0224800100.

 

فوانيس في إنتركونتينينتال سميراميس

مع المنظر المبهر والقعدة المكشوفة الرائعة، خيمة فوانيس من إنتركونتينينتال سميراميس تتميز بالأناقة بمكانها في تراس الفندق المطل على النيل وبـ توعد كل زوارها بتجربة رمضانية ممتعة، تقدر تستمتع بالإفطار والسحور هناك -من المطبخ الآسيوي، الإيطالي والشرق الأوسط– مع العروض الترفيهية في الويك إند؛ فوانيس فعلاً هو المكان المناسب لخروجة ممتعة مع عائلتك أو أصحابك. للحجز ومعلومات أكثر، اتصل بـ 0227988000.

رمضان كريم!

مقترح