The Definitive Guide to Living in the Capital , Cairo , Egypt

الحياة في كايرو -
مقترح

زويلة.. حكاية باب قديم في القاهرة معروف باسم بوابة المتولي

أبواب القاهرة التاريخية القاهرة القديمة باب زويلة بوابة المتولي تاريخ القاهرة حكاية أبواب القاهرة
زويلة.. حكاية باب قديم في القاهرة معروف باسم بوابة المتولي
بواسطة
Mohamed Talaat

تصوير: إسلام مكي

يمكن مش كل المصريين يعرفوا إن باب زويلة هو نفسه الباب التاريخي المشهور بين المصريين باسم بوابة المتولي، واللي له حكاية عظيمة بتثبت إن القاهرة مش مجرد عاصمة موجودة على كوكب الأرض، دي تاريخ وحياة وحضارة وحكايات مبهرة.. تعالوا نتعرف أكتر على باب زويلة العريق اللي عمره أكبر من عمر دول كتير في عالمنا وده مش تقليل من الدول دي، لكنه تعظيم للباب المدهش ده.

 

باب زويلة أو بوابة المتولي هو أحد أبواب “القاهرة القديمة” في العاصمة المصرية القاهرة. سبب شهرة البوابة أو الباب ده هو إنه المكان اللي عُلّقت تحته رؤوس رسل هولاكو قائد التتار لما وصلوا مصر برسائل تهديد لشعبها، وده أدى وقتها للانتصار على المغول ونشوء دولة المماليك.

باب زويلة شهد كمان إعدام آخر السلاطين المماليك، طومان باي، وده بعد دخول السلطان العثماني سليم الأول لمصر وضمها للدولة العثمانية، ووقتها كانت نهاية دولة المماليك.

تم إنشاء الباب في العام 485 هجرية (1092 ميلادي)، وبيتكون من كتلة بنائية ضخمة عمقها 25 متر وعرضها 25.72 متر وارتفاعها 24 متر عن مستوى الشارع.

بيتكون الباب من برجين مستديرين بيتوسطهم ممر مكشوف بيؤدي لباب المدخل.

سبب التسمية

بتعود التسمية “زويلة” لكونه الباب اللي كان بيؤدي بالقوافل المتجهة غربًا إلى مدينة زويلة في عمق الصحراء الليبية، وكانت مدينة زويلة زمان على طريق مدن القوافل وكانت واحدة من أهم مراكز التجارة مع أفريقيا.

وممر باب زويلة مسقوف كله بقبة، لكن للأسف اختفت منه معظم العناصر الزخرفية.

فيه معلومة مهمة كمان مش كتير يعرفوها، وهي إن الملك المؤيد أبو النصر شيخ لما قرر يبني مسجده عام 818 هجرية، اختار مهندس الجامع البرجين الخاصين بباب زويلة علشان يقام عليهم مئذنتين للجامع.

وأخيرًا.. تعرفوا ليه الباب اتسمى كمان باسم بوابة المتولي؟

مافيش داعي تفكروا كتير، إحنا هنقول لكم؛ كان بيقعد في مدخل باب زويلة الشخص الـ (متولي) تحصيل ضريبة الدخول إلى القاهرة!

باب زويلة لسة بيقاوم عوامل الزمن، وبيعتبر من أجمل أبواب القاهرة القديمة وأروعها.

مقترح