The Definitive Guide to Living in the Capital , Cairo , Egypt

الحياة في كايرو

كل اللي محتاجين تعرفوه عن تطبيق Dubci لنقل الأفراد.. تجربة جديدة مع كايرو 360

أوبر ابليكيشن دابسي عربية كريم مواصلات نقل
كل اللي محتاجين تعرفوه عن تطبيق Dubci لنقل الأفراد.. تجربة جديدة مع كايرو 360
بواسطة
Mohamed Talaat

خدمات النقل التكنولوجي بتتطور في مصر، وكل يوم فيها جديد، وبعد اندماج شركتي أوبر وكريم، ظهرت من أيام شركة “Dubci – دابسي” اللي من الواضح إنها نازلة السوق بتقلها، وهتكون منافس قوي الفترة اللي جاية، وعلشان أهمية الخدمة دي هنقول لكم في السطور اللي جاية على كل اللي محتاجين تعرفوه عن التطبيق وأسعاره وتجربتنا معاهم.

التسجيل في التطبيق سهل جدًا، كل اللي عليك تدخل الإسم والإيميل ورقم التليفون، وكمان لما تسجلوا لأول مرة هتاخدوا 100 جنيه رصيد مجاني بتتوزع على الرحلات بنسبة 20% خصم لكل رحلة، وحاليًا الخدمات المتاحة في التطبيق هي نقل الأفراد بـ 3 فئات مختلفة، الأولى “دابسي Vip”، وبتكون بداية الرحلة بـ 12 جنيه، وسعر الكيلومتر 3.65 جنيه، ودقيقة الانتظار 0.65 قرش، والحد الأدنى للرحلة 17 جنيه، ورسوم الإلغاء 17 جنيه.

أما الفئة الثانية فهي فئة “دابسي العادي”، وسعر بدأ الرحلة فيها 7 جنيه، وسعر الكيلومتر 2.5 جنيه، وسعر دقيقة الانتظار 0.40 قرش، والحد الأدنى للرحلة 12 جنيه، ورسوم الإلغاء 12 جنيه، وأخيرًا الفئة الثالثة واللي اسمها “دابسي توفير”، وبتكون فيها سعر بداية الرحلة 6 جنيه، ودقيقة الانتظار 0.30 قرش، والحد الأدنى للرحلة 8 جنيه، ورسوم الإلغاء 8 جنيه.

وعلشان ننقل لكم الصورة صح، قررنا نجرب الخدمة وبالفعل طلبنا عربية من عندهم الساعة 8 الصبح، وعلى الرغم من إن أي شركة جديدة بتكون فيها صعوبات في الانتشار والتغطية وإيجاد عربية، لكن احنا طلبنا الخدمة من محطة الجيزة ولقينا عربية قريبة وصلت خلال 7 دقائق لنقطة الانطلاق واللي كانت محطة قطارات الجيزة، والكابتن كان ملتزم بارتداء الكمامة، وروحنا بيه لحد محطة سكة حديد مصر “رمسيس”.. في رحلة خدت 17 دقيقة بس للوصول.

الخدمة بشكل عام كانت ممتازة رغم قلة خبرة الكابتن في السواقة، والرحلة بعد الخصم عملت 37 جنيه في الفئة “العادية”، وخلال الرحلة ملاحظناش وجود كحول أو سبل وقاية للراكب في العربية زي ما هو متبع في معظم سيارات الشركات المنافسة، وعلشان كده بنتمنى الفترة اللي جاية يهتموا بإجراءات الوقاية لأنها مهمة جدًا الفترة دي.

تقدروا تحملوا التطبيق لأجهزة أندرويد  من هنا.

مستخدمي أجهزة أيفون ونظام التشغيل Ios تقدروا تحملوا التطبيق من هنا.

وعلشان تعرفوا أكتر عن التطبيق والخدمة تقدروا تتواصلوا مع خدمة العملاء من خلال رقم 15079 أو زوروا صفحتهم على فيسبوك من هنا.

 

مقترح