The Definitive Guide to Living in the Capital , Cairo , Egypt

الصورة الرئيسية: M abnodey on Unsplash

في القاهرة وغيرها من المدن المصرية، انتشار الكلاب الضالة في الشوارع بقى موضوع محل نقاش كتير بين الناس، سواء من اللي بيعبروا عن مخاوف حقيقية على سلامتهم، خصوصًا لما الكلاب تنبح بقوة أو تقف فجأة أمامهم في الطريق، أو من عشاق الحيوانات وخبراء سلوك الحيوان اللي شافين إن الخوف والعدوانية من الكلاب الضالة مش هو الحل.

واللي مهم نفهمه قبل أي حاجة هو إن الكلب كائن اجتماعي مليان إشارات لغوية وجسدية بيستخدمها لما يتعامل مع البشر أو مع كلاب تانية. في الغالب، نباح الكلب للبشر مش بيبقى رغبة في الهجوم، لكن تحذير أو طلب مسافة كافية. الكلب بيحاول يقلل التهديد ويحمي منطقته، وده رد فعل طبيعي في الحيوانات محتاجين نفهمه بشكل علمي.

في السطور الجاية، هنعرفكم على مجموعة نصائح عملية مصدرها الرئيسي هو إرشادات من مؤسسات الرفق بالحيوان ومنظمات سلوك الحيوان المعتمدة، اللي بتوصي بطرق غير عدوانية وآمنة للتعامل مع نباح أو وجود الكلاب في الشوارع.، وبتستند لأبحاث وتنظيمات عالمية في سلوك الحيوان، تساعدك تتصرف بثقة وأمان في مواجهة أي كلب ضال بنباح أو قرب فجائي.

خليك هادي.. ده مفتاح السلامة

أكتر حاجة بتصعب الموقف هي الخوف أو رد الفعل المفاجئ. لما كلب يشوف حركة سريعة، أو صياح، أو حد بيجري بخوف، ده ممكن يشجعه يلعب الدور العدائي أو يطاوع غرائزه الطبيعية في المطاردة.

علشان كده، مهم تقف في مكانك وتبقى واقف هادئ، وخليك واقف مستقيم، إيديك على جنبك، واتجنب التلويح بيديك.

مهم كمان تبص لعيني الكلب من غير تحدي مباشر، ولو محتاج تنزل بصرك شوية، اعمل ده بشكل هادئ ومن غير خوف.. وده بيوصل للكلب رسالة إنك مش تهديد، وبيقلل فرص أنه يطاردك أو يزيد من نباحه.

ما يفوتكش كمان: 5 محلات في القاهرة هتدلع حيوانك الأليف.. أكل وعلاج وإكسسوارات في مكان واحد

لغة جسمك بيفهمها الكلاب

الكلاب عندها رموز لكل حركة ولغة جسد بيعملها الإنسان. نظريات سلوك الحيوان بتقول إن الكلب ممكن يفهم إشارات بسيطة من الإنسان ويقرر يتعامل معاها. على سبيل المثال لو وقفت ثابت وبهدوء، جسمك هيبقى أقل تهديدًا للكلب، وده بيخلي نباحه أقل احتمالًا يتحول لهجوم.

ولو الكلب قرب منك، سيب له مسافة، وخليك واقف ثابت.

لإنك لو جريت أو لوحت بإيديك بقوة، ده ممكن يشوفه كعدوان أو تهديد، وبيزيد من احتمالات الهجوم أو المطاردة.

تعمل إيه لو الكلب بيهجم أو بيلاحقك؟

في مواقف نادرة ممكن الكلب ما يهداش بسهولة، خصوصًا لو كان في مجموعة كلاب أو بيحمي أراضيه، النصائح الذهبية هنا: ما تجريش! الركض بيحفز الكلب على المطاردة، وامشي ببطء للخلف أو للجانب علشان تزود المسافة بينك وبينه، ولو معاك أي أغراض شخصية، زي شنطة مثلًا، حطها بينك وبينه كحاجز غير عدواني.

ومهم تتجنب التواصل المباشر جدًا بالعين لو الكلب بيظهر عدوانية.

نصائح عامة للسلامة

لو المنطقة فيها عدد كبير من الكلاب، اختار طريق مختلف لو تقدر.

ما تتسببش في استفزاز للكلاب زي اللمس أو الطبطبة على الدماغ.

لو فيه أطفال، خليك جمبهم وعلّمهم يلتزموا الهدوء والوقوف ثابت.

ولو الكلب موجود في مكان ثابت وطبيعي، سيبه يهدأ لوحده بدل ما تقرب منه.

فهم سلوك الكلاب وتخفيف الخوف

العلم بيقول إن الكلاب الضالة جزء من البيئة الحضرية، وغالبًا بيتأقلموا مع وجود البشر حواليهم بطرق معقدة، مش بس عدوانية أو خوف. الدراسات اللي بتتكلم عن سلوك الكلاب الضالة بتقول إنهم بيتعلموا من سلوك الإنسان، يعني هدوءك بيأثر عليهم بإيجابية.

والخوف الشديد من الكلاب (الفوبيا) حاجة حقيقية عند ناس كتير، وبتتطلب صبر وفهم تدريجي لردود فعل الكلاب الطبيعية، ومهم تبقى فاهم إن التعامل الهادئ والمستنير بيقلل مشاعر الخوف مع الوقت، وبيخلق احترام متبادل بينك وبين الحيوان.

وأخيرًا..

التعايش مع الكلاب الضالة في القاهرة مش لازم يكون مليان خوف أو عدوان. العلم بيقول إن الكلاب بتستجيب للغة الجسد الهادئة.. والتصرف بثبات وبدون رعب بيقلل المخاطر.

وتاني، بنأكد إن تفادي الركض أو التلويح بيقلل هياج الكلب، وبصفة عامة فهم سلوك الكلب بيخليك تتعامل معاه بذكاء بدل ردود فعل عشوائية.. يعني باختصار، السلامة والأمان بييجوا من الفهم، مش من الخوف والرعب من الكلاب وصوتها.