The Definitive Guide to Living in the Capital , Cairo , Egypt

الصورة الرئيسية: Nathan Dumlao

لو كنت من عشاق القهوة، فأكيد في يوم خطر على بالك إنك ترجع لطقوس زمان وتشتري سبرتاية وكنكة وصينية نحاس علشان تحضر أحلى فنجان قهوة بنفسك، زي ما كانوا بيعملوا زمان. وعلشان التجربة تكمل، لازم كمان يكون عندك نوع بُن أصيل وجودته عالية.

وبمناسبة إن اليوم العالمي للقهوة كان من ساعات (الأربعاء 1 أكتوبر)، قررنا في كايرو 360 نعرفكم على أهم أماكن وأسعار أدوات القهوة في القاهرة التاريخية، وكمان نفتكر معاكم دليل البن اللي نشرناه قبل كده.

نقدر نقول إن مناطق شارع المعز وخان الخليلي والجمالية، من أكتر الأماكن اللي لسه محافظة على روح القاهرة القديمة، وهناك هتلاقي محلات وورش بتبيع كل الأدوات النحاسية اللي محتاجها علشان تحضر قهوتك بالطريقة التقليدية: من السبرتاية والكنكة، لحد الصينية والفناجين. لكن خليك عارف إن الأسعار مش ثابتة وبتختلف من مكان للتاني، وكمان بعض البياعين ساعات بيعرضوا الأسعار أعلى من الحقيقة.

وعلشان كده، النصيحة الذهبية لأي حد ناوي يشتري من هناك، إنه يلف شوية ويقارن الأسعار قبل ما يشتري. وغالبًا الورش الصغيرة اللي بتصنع النحاس بنفسها، بتكون أسعارها أقل وجودتها أفضل من المحلات الكبيرة.

وده متوسط الأسعار لمستلزمات القهوة:

السبرتاية: بتبدأ من 100 جنيه، ولو عليها شغل زخارف عالي (المعروفة باسم “سبرتاية الملكة”) سعرها ممكن يوصل لـ 280 جنيه، وغالبًا بيكون معاها باقي الأدوات.

الكنكة النحاس: سعرها بيبدأ من 100 جنيه.

السكرية: بـ 25 جنيه، ولو حجم أكبر تبدأ من 50 جنيه.

طقم القهوة كامل (صينية + سبرتاية + فنجان + كنكة): سعره من 250 جنيه لحد 500 جنيه.

الفنجان الصغير: بـ 14 جنيه.

الصينية النحاس: سعرها بيبدأ من 120 جنيه.

اللي بيفكر يشتري الأدوات دي، التجربة مش بس في الشراء، لكن كمان في روح المكان.. وإنت ماشي في الجمالية أو خان الخليلي، هتحس إنك دخلت كتاب مفتوح من تاريخ مصر، وهتشوف الصناع وهم بيشكّلوا النحاس بإيدهم، وده في حد ذاته تجربة تستحق الزيارة.

أفضل أماكن بيع البن في القاهرة:

ولأن أدوات القهوة من غير بن أصيل مايبقاش ليها طعم، فإحنا في كايرو 360 نشرنا لكم دليل عن أشهر 7 أماكن لشراء البن في القاهرة. والدليل ده بيعرض لكم أهم محلات البن اللي جربناها بنفسنا، واللي بنرشحها لأي عاشق قهوة عايز جودة عالية وطعم مميز.

ما يفوتكش: لعشاق القهوة.. أشهر 7 أماكن تشتروا منهم بن في القاهرة