The Definitive Guide to Living in the Capital , Cairo , Egypt

تتميز محلات القاهرة بالتنوع بطريقة لطيفة. وبعيدًا عن كل البضاعة المقلدة والمهربة بطرق غير شرعية، مجموعة منتقاة من بيوت الموضة من أصحاب الضمائر بـ يختاروا الطرق السليمة، يدفعوا زيادة شوية، ويقدموا لعشاق الموضة القاهريين اللى نفسهم فيه؛ ماركات عالمية بجودة عالية. اعمل حسابك أن مافيش أكل لمدة شهر. 

 

بايمن – Beymen: 

مكانه فى الفور سيزونز نايل بلازا، فى جاردن سيتى، ويحتل بايمن المرتبة الأولى فى قائمة الأماكن المناسبة لرحلة بحث شرسة عن ماركات مشهورة تتميز بجودتها العالية. أسماء معروفة زى Hervé Léger، روبيرتو كافاللى وبرادا موجودين باستمرار وبـ يوفروا للمتسوقين تنوع لطيف من الملابس –سواء سهرة أو كاجوال– والأحذية، شنط يد وإكسسوارات ثانية. تابعوا صفحتهم على الفيسبوك علشان تعرفوا أخر الأخبار عن أحدث تشكيلاتهم.

 

إيجو – Ego: 

إيجو بـ يقدم مجموعة من المنتجات زى الأحذية والشنط من ماركات تشمل YSL،Stella McCartney وJimmy Choo، عندهم كمان قسم رجالى فيه بدل، وملابس رسمية، وأحذية من  Armani و Hugo Bossأما خطوط أزياء أطفال لمصممين مشهورين فدى كمان موجودة منهم Armani وRalph Lauren، المحل أكبر مما يمكن أنه يبان في الأول؛ لدرجة أن عندهم ترزى خاص بالمحل. صحيح أن الفرع الرئيسى موجود فى هليوبوليس، بس سكان وسط البلد أكيد هـ يفرحوا لما يعرفوا أن فرعهم الجديد قريب جدًا فى الزمالك. اضغط هنا علشان تزور صفحتهم على الفيسبوك.

 

هيب – Hip: 

الابن البكرى لرانيا شاهين، مكانه فى فيرست مول الجيزة، ويعتبر مكان آخر مهم فى مشهد التسوق الراقى. المحل بـ يقدم تصميمات مشاهير زى Balmain، Zac Posen و Alexander McQueen، وكمان مصممين أقل شهرة منهم David Szeto وJo No Fu، المميز للمكان الأنيق هو تقديمه لخصم يوصل 80% خلال موسم التخفيضات. تابع أحدث أخبارهم من صفحتهم على الفيسبوك.

 

يوفوريا – Euphoria: 

محل آخر من المحلات الراقية هو يوفوريا، مكانه على شارع أبو الفدا فى الزمالك. وسط جو أنيق وراقى بـ تقدم حنان الشافعى صاحبة المكان مجموعة متكاملة من منتجات Christian Dior، Hervé Léger و La Petite Salopeمع ماركات ثانية تشمل ملابس لكل المناسبات- وطبعًا ما ننساش الأحذية. بالنسبة لموسم الصيف، يوفوريا عنده مجموعة كبيرة من ملابس البحر. يوفوريا كمان عامل منطقة فى الخارج بـ ترحب بالزبائن علشان يرتاحوا فيها بعد ما يدفعوا اللى حيلتهم.

 

فيلا بابوشكا – Villa Baboushka: 

الأبواب الفوشيا العملاقة بـ ترحب بك فى فيلا بابوشكا الموجود على شارع إسماعيل محمد فى الزمالك، وتعتبر مؤشر إيجابى عن الموجود فى الداخل؛ فخامة وإسراف فى الصرف، مع لمسة من الغرابة. البوتيك بـ يقدم مصممين عالميين منهم Vivienne Westwood و Mara Hoffman مع أقرانهم من الشرق الأوسط زي بهية وشروق. بجانب الملابس، الأثاث الموجود والتحف متوفرين للبيع، نتحداكى تقدرى تسيبى المحل وأيدك فاضية. زوري صفحتهم على الفيسبوك لتفاصيل أكثر.

 

أميوز – Amuse: 

محل آخر بـ يقدم حاجات أكثر من مجرد ملابس هو أميوز. عبارة عن شقة مستغلة كمخزن كمان فى الدور الأرضى من برج جدة على شارع إسماعيل محمد فى الزمالك على الطراز الحديث وعنده أشكال وألوان من الملابس، والمجوهرات، والإكسسوارات وكمان أثاث، أدوات منزلية متعددة وكتب عن الأزياء، التصميم والفن مع بعض. خطوط الأزياء المعروضة تشمل مصممين زى شروق، House of Harlow وClash، وكمان تقدر تلاقى قطع أثاث محلية الصنع من ماركة الشيمى. صفحتهم على الفيسبوك بـ تساعدك تتابع كل جديد.

 

غزل بنات: 

صحيح غيروا مكانهم، بس لسه موجودين فى الزمالك وتحديدًا فى مركز دجلة على شارع حسن صبرى. البوتيك ده مكان آخر ننصح به لو معاك كاشات وعاوز تصرفها. مع ماركات زى Helmut Lang، Rebecca Taylor وGraham & Spence، غزل بنات قدر يقدم الجودة العالية مع الأناقة، وبأسعار فى نفس الوقت أقل شوية من المحلات اللى سبق وتكلمنا عليها. عمومًا، الأكيد أن المحل ده قادر على إرضاء كل الأذواق من الشيك والبوهيمي، لغاية الروش والغريب. اضغط هنا علشان تعرف أكثر عن تشكيلتهم.

ياللااا، حان وقت الدفع!