The Definitive Guide to Living in the Capital , Cairo , Egypt

لما بـ ندخل شارع المعز بـ نحس أننا دخلنا عالم ثاني، مليان جمال وراحة وقصص تاريخية مبهرة، ووسط وإحنا مبسوطين بالجو ده شفنا قطع جميلة منورة من السيراميك بأشكال مختلفة منها البيضاوي والمربع أو الفوانيس الكبيرة والصغيرة في أكثر من محل بطول الشارع بس أكثر محل جذبنا وقولنا لازم نكتب عنه كان "بازار آل شعبان" في نصف الشارع تقريبًا.

أول ما بـ تدخل من المحل بـ تلاقي أرفف منورة على يمينك وعلى شمالك، ومتعلق فوانيس نحاس في السقف، على اليمين عجبنا مصباح منور على شكل بيضة كبيرة، أجمل حاجة فيها ألوانها اللي بـ تنعكس مع الضوء، وهي كانت مستوحاه من الستايل الهندي أزرق وأحمر وأخضر وأبيض ومزخرفة بأشكال ورود، غير البيض الصغير اللي بـ يبقى معمول من السيراميك المكسر فبـ يبقى شكله شبه تصميم حجر الفسيفساء، وفيه منهم اللي لونين بس أزرق في أحمر مثلًا، أو كل الألوان في بعض ومنها اللي بـ يغلب عليها اللون الأبيض أو الألوان الغامقة.

كمان كان فيه أشكال مختلفة كثيرة مبدعة مزينة بنفس الألوان المبهجة، ممكن على شكل فازة أو طبلة مقلوبة أو دائرة شكلها عامل زي بلورة الساحرة وفيها وردة في نصفها من الناحيتين وأغلبها كان أزرق مع الإضاءة شكلها وهمي، أو على شكل مربع صغير عامل زي الفانوس بس مفتوح من فوق. عجبنا كمان شكل منهم حلو قوي واخد شكل الفازة بس منحوت من تحت على رفيع ومثبت بقطعة خشب من تحت، فيه منه الستايل الهندي اللي ألوانه كثيرة ومزخرفة ورود، وفيه منه اللي منقوش عليه زي نقش حجر الفسيفساء العشوائي. وأسعارهم بـ تبدأ من 70 جنيه للحجم الصغير لـ 250 جنيه برضه على حسب الشكل واللون، كمان كان عنده مبخرة صغيرة على شكل نجمة أو دائرة مخرمة ومن النحاس، والواحدة كانت بـ 50 جنيه تقريبًا.

أما بقى بالنسبة للفوانيس، فمن كثر جمالها مش عارفين نوصفها بإيه، كان فيه فوانيس صغيرة وفوانيس كبيرة جدًا نحاس أو معدن (أخف وسعره أرخص بس شغله مش حلو قوي زي النحاس) وكان فيه منه اللي زجاجه ملون أصفر وأحمر وأزرق، أو أبيض وأصفر بس أو من غير زجاج بزخرفة في النحاس بس، وطبعًا أسعارهم غالية يعنى من 400 جنيه وأنت طالع كده لحد 2500 جنيه على حسب حجم ونوع شغل الفانوس.

تجربتنا هناك كانت مبهجة وفريدة، لأن كل المنتجات دي مصرية 100%، وفعلًا جميلة جدًا وتنفع هدية مختلفة لأي مناسبة.