The Definitive Guide to Living in the Capital , Cairo , Egypt

دائمًا من فترة للثانية الواحد بـ تطلع له مناسبة من تحت الأرض وبـ يبقى مزنوق في الوقت ومحتار مش عارف يجيب إيه، خاصة لو هو في منطقة الدقي والجيزة، بس النهارده محل "بريتي بينك –Pretty Pink " حل لك المشكلة دي أنه بـ يوفر لك كل الهدايا لكل المناسبات اللي ممكن تقابلك من احتفال بالجواز للاحتفال بالمولود الجديد ويوم ميلادك أو أي مناسبة ثانية خاصة.

مبدأيًا المحل مقسم لثلاثة أقسام: قسم واضح ظاهر لك أول ما تدخل وفيه ورد جميل (هو اللي لفت نظرنا أننا ندخل المحل) وغرفتين على شمالك لازم تدخل المحل علشان تشوفهم، أول حاجة لفتت نظرنا tableau مفرغ مكتوب عليه Congratulations or Happy birthday وده بـ يعملوه لك بالطلب لو عاوز باللون والشكل اللي تحبه، وأسعاره بـ تبدأ من 150 جنيه على حسب الحجم والجودة بتاعته لحد 300 جنيه.

كمان فيه كل أشكال الماج اللي تحبها بسعر 100 جنيه، عجبنا واحد عليه رسمة Winnie the Pooh، وألوانه كانت حلوة جدًا، غير شخصيات ديزني مختلفة، وكمان كان فيه ماج لونه أحمر مكتوب عليهHappy Birthday  بنفس السعر، وكان فيه برواز بلاستيك حوله فرو كأنه مخدة شكله لطيف وفي منتصفه قرد بـ 60 جنيه، وكان فيه iPad cover كله فرو ومكتوب عليه "Rock me baby" بـ 189 جنيه.

وعجبنا مجموعة تماثيل دمها خفيف، منها تمثال لثلاث بنات صحاب عندهم ضفائر كل واحدة عاملة شكل "لا أسمع، لا أرى، لا أتكلم" وكان بـ 70 جنيه، لكن اللي مالي المحل الدباديب.. كل أنواع الدباديب بكل أحجامها وأسعارها بـ تبدأ من 130 على حسب الشكل واللون، كمان كان فيه قسم خاص بكل ما يتعلق بأعياد الميلاد من أطباق وكروت معايدة لكل المناسبات والبلالين الهليوم والعادية واللي بـ تبدأ أسعارها من 38 لحد 300 جنيه.

بس أجمل قسم عجبنا قسم الورد اللي كان فيه منعش ومفتح بالذات أنه كله مستورد من أول التيوليب اللي محتفظ به ببصله علشان ما يموتش والواحدة بـ 15 جنيه، والليلي الفرع بـ 25 جنيه، ولحد الورد الأبيض المستورد اللي مالوش ريحة الـ 8 بـ 10 جنيه، وأنت بقى بـ تكون البوكيه على ذوقك، كمان كان عنده بوكيهات جاهزة والحقيقة أن أسعارها رخيصة جدًا بالنسبة لحجمها والمجهود اللي اتعمل فيها، زي بوكيه على شكل بيت بـ 300 جنيه، وكمان هم بـ يوصلوه للمكان اللي أنت عاوزه.

ومن الحاجات الجديدة اللي عجبتنا جدًا، رسالة ملفوفة بطريقة "رسالة إلى الوالي" حاجات زمان دي وجلد، منها اللي مكتوب داخلها رسالة زي I love and you are so" special.. "  والواحدة أسعارها بـ تبدأ من 5 جنيه الصغيرة جدًا لحد 35 جنيه، وممكن تطلب تكتب رسالتك الخاصة بس بـ تتعمل مخصوص وبـ تبقى أغلى طبعًا، أما المضحك بقى أن فيه صندوق خاص بالرسالة دي فوقه جلد بس هو نفسه كرتون بـ 35 جنيه، يعني الرسالة تبقى بـ 5 جنيه ولا 25 جنيه والصندوق يبقى بـ 35 جنيه، "والعلبة دي فيها إيه"، بس الجميل أنك ممكن تشتري الرسالة لوحدها وتحطها في الصندوق اللي فيه هديتك، وبالمناسبة عندهم صناديق بأشكال مختلفة كثير هـ تعجبكم.

محل Pretty Pink محل متميز بأنه بـ يوفر لك كل اللي تحتاجه علشان تعمل هدية جميلة ومختلفة، لدرجة أنه بـ يقترح عليك أفكار جديدة للهدايا، يعنى من الآخر محل بتاع كله، كان فاتح بقى له 10 سنين وقفل ولسه فاتح ثاني قريب.

لو اتزنقت ومحتاج تشتري هدية جميلة مختلفة لازم تعدي على Pink.