The Definitive Guide to Living in the Capital , Cairo , Egypt

ميزة سيتي سنتر المعادي أو كارفور المعادي زي ماهو مشهور هي أنك هـ تلاقي
في الممر الطويل الخارجي بجانب محلات الملابس والماركات العالمية المعروفة
والمنتشرة بفروعها في كل المراكز التجارية والشوارع المهمة، هـ تلاقي عدد من
المحلات المميزة والماركات العالمية اللي مش موجودة في أي حتة زي «أزارو» على سبيل
المثال لا الحصر، ومحل «تيرانوﭭـا» اللي له فروع قليلة جدًا رغم أن الماركة
الإيطالية الشهيرة لها معجبين ومريدين كثير في مصر، له فرعين في الإسكندرية، وفرعين في القاهرة واحد في المنصورة
وواحد في المهندسين.

المساحة معقولة جدًا بالداخل، والمحل فيه لمسة عشوائية مقصودة في توزيع
الملابس، علشان تبقى لائقة على الطابع الـ Funky للمكان، و بـ يكمل ده
الإضاءة الملونة الخافتة اللي بـ تبقى في صالات الديسكو، وطبعًا الموود ده مش هـ
يكتمل إلا بموسيقى الهاوس، لكن الصوت كان واطي لحسن الحظ لأننا بـ نتوتر بسرعة من
النوع ده من الموسيقى.

ملابس بناتي –ما نقدرش نقول حريمي– بموديلات وستايلات عصرية جدًا، توصل
لحد الجنون أحيانًا، والملفت للنظر كان الكم الكبير من الجواكت والبولوﭭرات
البناتي بتشكيلات مافيش زيها في أي حتة، خاصة الجواكت المنفوشة اللي بـ تفكرنا
بملابس رواد الفضاء بالألوان الفضي والموﭫ والأزرق اللي بـ
يلمع وكان سعرها بعد الخصومات حوالي 250 جنيه، وفي العرض كانت الجواكت دي محطوطة
على مانيكان لابسة تحتيها تي شيرتات عليها رسوم شخصيات ديزني ولوني تونز، وكأنها
رسالة للمشتري أن الملابس دي مش مناسبة إلا لمرحلة عمرية معينة، رغم أن الجواكت دي
متوفر منها بكل المقاسات.

شماعات وستاندات طويلة في وسط المحل، أكثر حاجة ملفتة كانت البلوزات
البناتي المزركشة زي اللي كانت منتشرة في السبعينيات، بألوان زاهية ودافئة وكانت
بأكمام قصيرة وسعرها 60 جنيه فقط للقطعة، وعجبنا أن الخامات جيدة وعرفنا من
العاملين في المحل أن سياسة الاستبدال والاسترجاع قائمة لو ظهر أي عيب في النسيج
حتى بعد مرور شهور، وده طمئننا جدًا لأننا ياما أخذنا مقالب بعد أول غسلة والمشكلة
أن ده بـ يحصل مع ملابس غالية من محلات مشهورة المفروض أن لها سمعتها.

الناحية الشمال من المحل مخصصة لملابس الأطفال، أولاد وبنات. برضه نفس
الموديلات المجنونة والجواكت المنفوشة لكن بمقاسات صغيرة شكلها تحفة، وفيه
بنطلونات جينز وقماش بأسعار معقولة (150 جنيه) أو أقل. وفي وسط المحل عدد من
الكاونترات المعروض عليها موديلات السنة اللي فاتت بأسعار خيالية بمناسبة التصفية،
منها شيرتات وبولوﭭرات وفساتين قصيرة بأسعار من 40 لـ 60 جنيه.

إكسسوارات وشنط ومحافظ وأحزمة وكابات وحاجات كثير مرمية على ستاندات هنا
وهناك، وعينك هـ توجعك من كثر اللافتات والرسومات على الجدران والأسهم اللي بـ
تشاور على الأقسام، والمرسومة بطريقة الكوميكس وبألوان مبهجة؛ داخل «تيرانوﭭـا» هـ
تنسى أنك لسه في كارفور المعادي، وهـ تستمتع بالموديلات والعروض اللي ما بـ تخلصش.
فريق العمل متعاون ومش هـ يبقى موجود جنبك إلا لما تطلب منه ده، وده سبب ثاني
يخلينا نحب المكان.