The Definitive Guide to Living in the Capital , Cairo , Egypt

من ضمن الحاجات اللي الواحد لازم تكون معاه في الصيف هي نضارة الشمس؛ فزي ما هي تعتبر من قطع الإكسسوار المهمة زي ما لها فايدة حماية العين. وبما أننا نشرنا مقال عن أهم الحاجات اللي تأخدها في الاعتبار وأنت بتختار نضارة الشمس، خلينا نقترح عليك تجيب منين النضارات.

وعلشان نرضي كل الأذواق هنقترح عليك حسب اللي أنت محتاجه من النضارة؛ يعني مثلًا لو أنت محتاج نضارة تعمر معاك وتكون مزودة بحماية ضد الأشعة فوق البنفسجية بنسبة توصل لـ 100%، وفي نفس الوقت تكون ماركة مشهورة ولها ضمان تقدر تروح أماكن مصدرها موثوق فيه زي مغربي للبصريات – Magrabi Opticals  أو بركة – Baraka واللي بيتميزوا بمجموعة كبيرة من الاختيارات اللي أكيد هتلاقي فيها اللي يناسبك. ده غير أنك ممكن تخلي نضارة الشمس بتاعتك نضارة شمس بعدسات طبية. العيب الوحيد في الأماكن دي أنك مش هتدفع أقل من 1500 جنيه في النضارة، إذا ما كانش أكثر –وده طبعًا بيرجع لنوع النضارة وموديلها.

أما للناس اللي بتحب تغير في نضاراتها، وبتستخدمها كنوع من أنواع الإكسسوار، ففيه محلات ملابس كثيرة بتبيع نضارات من ضمن الإكسسوارات –غير كده ما ننصحكش أنك تشتري لأن النضارات مجهولة المصدر ضررها أكبر من نفعها. ودي مجموعة من المحلات اللي ممكن تلاقي فيها:

 

إتش & إم – H&M:

مجموعة إتش & إم الموسم ده بتتميز بالشكل المستدير واللي متوفر منها ألوان كثيرة للعدسات وجسم النضارة نفسه. المجموعة الحريمي أسعارها مناسبة لكل الميزانيات وبتبدأ من 89 جنيه وبتوصل لـ 259 جنيه. أما المجموعة الرجالي، فبالرغم من أنها مش بتنوع المجموعة الحريمي، إلا أن حظ الشباب كان أوفر من حيث الأسعار، فالنضارات أسعارها بـتبدأ من 99 جنيه وبتوصل لـ 119 جنيه، وستايلها مش بيتنوع ما بين الشكل المستدير و الشبه مستطيل.

 

بيرشكا – Bershka:

بنفس الشكل المستدير –لأنها الموضة السنة دي- بيرشكا مجموعته الحريمي استدارة الإطار والعدسة جريئة، ولكن للناس اللي مش بتليق عليهم الإطارات المستديرة ممكن تلاقوا الشكل الشبه مستطيل بإطار بلاستيك منقوش وسادة، وكمان الشكل المثلث المشهور Aviator، والأسعار ما بين 129 جنيه و169 جنيه.

بنفس الأسعار، مجموعة الشباب بعيدة نوعًا ما عن الشكل المستدير، وأغلب الإطارات بلاستيك ما بين منقوش وسادة وغالب عليهم البني والأسود.

 

مانجو – Mango:

مجموعته هي الأكبر ضمن مجموعة المحلات اللي بتبيع النضارات كإسسوار، ومش بس كده دي كمان بتتميز بأشكالها المتنوعة ما بين المربعة، المستطيلة والمستديرة. أسعار النضارات أغلى من أسعار الأماكن الثانية؛ فمن غير التخفيضات النضارة سعرها بيبدأ من 199 جنيه وبيوصل لـ 299 جنيه، ولكن في الوقت الحالي فيه تخفيضات فهتلاقي مثلًا نضارات سعرها الأصلي كان 249 وبقت بعض التخفيض 119 جنيه.

المجموعة الرجالي كبيرة هي كمان ومتوفر منها أشكال كثيرة، وسعرها موحد –حسب المجموعة الحالي- وهو 299 جنيه، أما النضارات اللي نازل عليها تخفيض، فهتلاقيها بـ 149 جنيه في الوقت الحالي.

 

ستراديفاريوس – Stradivarius:

بالرغم من أننا مش كثير بنصادف فيه نضارات زي الأماكن الثانية اللي كتبنا عنها، إلا أنه عنده مجموعة موحدة السعر وهو 129، وهي بتتميز بألوانها الزاهية زي الوردي والبنفسجي. وأغلب المجموعة المتوفرة مستديرة وإطاراتها معدنية، ولكن ده ما يمنعش أن فيه كذا واحدة بلاستيكية وألوان إطاراتها كلاسيكية زي البني والأسود.

وبما أن ستراديفاريوس محل ملابس حريمي، فطبيعي جدًا أن ما يكونش فيه نضارات رجالي هناك.  

 

بول & بير – Pull & Bear:

المجموعة الرجالي مش هيخرج سعرها عن 169 و179  جنيه، وهي نوعًا ما محدودة، ولكن المجموعة الحريمي أكبر وبالتالي متنوعة أكثر ولحسن حظنا سعرها أقل بتبدأ من 129 لحد 169 جنيه. معظم الأشكال مستديرة ولكن فيه منها ألوان غير تقليدية زي الأزرق والمنقوش والوردي.