The Definitive Guide to Living in the Capital , Cairo , Egypt

فيه ناس كتير بتحب القراءة، لكن للأسف، وبسبب الظروف الاقتصادية الصعبة، بيلاقوا إن أسعار الكتب غالية جدًا في المكتبات.. طيب إيه البديل؟ أفضل بديل لشراء الكتب بسعر رخيص هو التوجه لأماكن بيع الكتب المستعملة. أغلبنا عارف كويس سور الأزبكية بالعتبة، واللي مليان كتب مستعملة في كل المجالات، لكن سور الأزبكية مش هو المصدر الوحيد للكتب المستعملة. جمعنا لكم في الموضوع ده، أفضل أماكن تشتروا منها كتبت مستعملة بأسعار معقولة جدًا.

 

مكتبة المعادي للكتب المستعملة

موجودة في شارع 9، في ممر صغير ومش واضح، لكنها كنز حقيقي وعاملة زي نغارة علي بابا، فيها كتب في مجالات كتير، وأحيانًا بيعرضوا كتب مجانية ودي حاجة عظيمة بتميزهم.

الكتب اللي باللغة الإنجليزية مسيطرة، لكن برضه فيه كتب عربية مهمة وحلوة وتستحق القراءة.

العنوان: بجانب مترو ثكنات المعادي، شارع 9.

اعرفوا عنهم أكثر وشوفوا الكتب من هنا.

مكتبة رحَّالة

مكتبة إلكترونية لبيع الكتب المستعملة، وعندهم خدمة التوصيل للمنازل. أسعار الكتب عندهم بتعتمد على قيمة كل كتاب وحالته مش وزنه، وعندهم تشكيلة كبيرة من الكتب بأسعار رخيصة وفي حالة جيدة للقراءة.

تقدروا تتعرفوا عليهم أكثر وتطلبوا الكتب اللي بتحبوها من هنا.

 

سور السيدة زينب

بيضم حوالي 40 مكتبة فيها كتب في مجالات مختلفة (ثقافية، عملية، تاريخية، أدبية، وغيرها من التخصصات) وهتلاقوا هناك كتب بأسعار بتبدأ من 3 جنيه.

العنوان: بجوار محطة مترو السيدة زينب.

 

سور جامعة القاهرة

بيضم سور جامعة القاهرة، وتحديدًا في المساحة اللي بين باب كلية التجارة ولحد نهاية السور قبل ما تدخل على الشارع اللي بيوصلك للباب الرئيسي للجامعة، عدد كبير من الكتب المستعملة، لكن بيغلب على معظمها الطابع الأكاديمي، لأن السور بيستهدف طلاب الجامعة بشكل أساسي، لكن عندهم كتب في مجالات مختلفة برضه، زي الروايات وكتب الأطفال والمجلات وأكثر، وهتلاقوا هناك كمان كتب نادرة ومهمة وحالتها حلوة.