The Definitive Guide to Living in the Capital , Cairo , Egypt

من الحاجات اللي كلنا متفقين عليها أن الطبخ مش مهمة سهلة عند كل الناس، بس الحقيقة أن تحضير أكلة بيتي في منتهى السهولة. مشكلتنا الحقيقية فعلًا هي زحمة الشغل أو حتى الكسل اللي بيجيلنا أول لما نسمع كلمة مطبخ، وعلى طول نلاقي نفسنا مسكنا السماعة وطلبنا أكل من بره. إمبارح كان يوم من الأيام اللي طلبت معانا نرتاح في البيت ونطلب أكل من أستاذ الوجبات المجمدة "فوود سوينجز-Food Swings"

فكرة فوود سوينجز فريدة من نوعها وهي تقديم أكل بيتي مجمد ممكن نسخنه في المايكرويف أو الفرن أو حتى في جهاز محضر الساندويتشات. الوجبات دي ممكن تتخزن في الفريزر لغاية 3 شهور، وبتحتاج من 10-30 دقيقة للتسخين. بعد الكلام ده كان لازم نجرب. فوود سوينجز بيوصلوا الطلبات لمناطق مختلفة في القاهرة في أيام مختلفة، وممكن تعمل الآوردر عن طريق مكالمة تليفون أو رسالة على الفيس بوك – تقدر تتابع مواعيدهم من هنا.

لاقينا 8 اختيارات في المنيو من قسم 'Frozen on Duty' مع 4 أنواع من قسم 'Pizza Madness'. كان في كمان أصناف لذيذة منها حواوشي مكسيكي (54 جنيه) وبيتزا شاورما (49 جنيه) بس إحنا قررنا نطلب من المقبلات طبق ريزوتو بولز (32 جنيه) وبالنسبة للأطباق الرئيسية استقرينا على لازانيا لارج (98 جنيه) وميكسيكان تشيكن راب (41 جنيه).

لازم في الأول نتكلم عن شكل التغليف المبهر المكتوب عليه تعليمات التحضير بوضوح مع فائدة تغليف الأكل بتفريغ الهواء، والفكرة أن نزع الأوكسجين بيزود من عمر الأكل ويحافظ عليه طازة، وفي نفس الوقت بيسهل من تخزين الأكل في الفريزر.

الريزتو بولز كانوا عبارة عن 17 كرة كلهم محشيين جبنة، والريزوتو نفسه كان هايل وطعمه ممتاز، ونقدر نقول أنهم قدروا يعملوه على طريقة الآل دينتي زي ما الكتاب بيقول. تتبيلة العجينة والتوابل الإيطالية كانوا ممتازين، ولونها كان ذهبي رائع، بس الفضل يرجع لنا طبعًا.

الفرن بتاعنا كان بعافية شوية – وده فكرنا إننا محتاجين نشتري واحد جديد – فقررنا نسخن اللازانيا بالمايكرويف. بعد ما جربناها كان عندنا سؤال واحد: إيه السحر اللي استخدموه علشان يطلعوا اللازانيا طازة بطبقات البشاميل اللذيذة مع الجبنة والبيف بولونيز بتتبيلتها الرائعة مع صلصة الطماطم، وطبعًا أهم عنصر في الطبق وهو عجينة اللازانيا.

بصوا يا جماعة خلونا نتكلم بصراحة، إحنا ماحرقناش الميكسيكان تشيكن راب. العلامات السوداء اللي أنتم شايفينها على الراب هي علامات الشوي الجميلة. هم كانوا 5 راب عايزين يتسيحوا في المايكرويف وبعدين نسخنهم في محضر الساندويتشات. على الورق، خلطة الفراخ مع الفلفل الأحمر والذرة والفاصوليا الحمراء والبصل الأخضر والسبانخ والفلفل الحار والجبن الشيدر المبشور حاجة حكاية، بس الحقيقة أن طعم الجبن كان مختفي والفلفل الحار كان طاغي على الطعم.

خلصت أكلتنا مع برطمان سينامون كراميل رول (22 جنيه) وده طبعًا مش بيدخل في المايكرويف، بيوصلك جاهز على الأكل. الموضوع مش محتاج كلام كثير، طبقات خفيفة من رول القرفة عليها صوص الكراميل اللذيذ والكريمة وكمية كويسة من عين الجمل. زي ما قالوا الحلو ما يكملش، لكن كان ممكن يكمل لو كانوا شالوا الكريمة اللي ملهاش طعم أو لزوم مع القرفة والكراميل.

الأكيد أن فوود سوينجز خيار عملي جدًا والتجربة نفسها كانت ممتعة. الطلب وصل في المعاد والتواصل معاهم على الإنترنت كان سريع وعملي، وعمومًا الفكرة أصلًا ممتازة وبتوفر الوقت والمجهود للمتزوجين حديثًا أو الأمهات العاملات أو العزاب. الموضوع كمان أحسن بكثير من الأكل المجمد الموجود في السوبر ماركت، بس لو كنت بتدور على حاجة مختلفة، فالتنوع عندهم مش كبير.