The Definitive Guide to Living in the Capital , Cairo , Egypt

هو صحيح كل حاجة بنعيشها بتخلينا نحلم باليوم اللي نهرب فيه من القاهرة ونسيب كل حاجة ورانا، بس من مميزات العيشة في مدينة فريدة من نوعها زي قاهرة المعز إننا نقدر نشتري كل حاجة أونلاين وكمان توصل لغاية باب بيتنا؛ من خضار لأجهزة منزلية لهدوم، وحتى الهدايا ممكن تشتريها أونلاين بكل سهولة.

“فيريرو بوكيه-Ferrero Bouquet” من أجدد الصفحات اللي قابلتنا على الفيسبوك وهي متخصصة في بيع الهدايا أونلاين وعندهم تشكيلة من البوكيهات المعمولة بشوكولاتة فيريرو روشيه اللذيذة ومتزينة بشوية ورد.

لو كنت من الناس اللي مش غاويين لف على هدايا وفي نفس الوقت عايز حاجة مختلفة ومميزة، فيريرو بوكيه بيقدم لك مجموعة اختيارات متنوعة تختار منها اللي يعجبك. الفكرة إن فيريرو بوكي غير معظم صفحات التسوق الإلكترونية اللي بتنزل صور منتجاتهم من غير ما يكتبوا أسعارها وتستناهم يبعتوا السعر على الإنبوكس، وكل حاجة على صفحتهم مكتوب عليها كمية الشكوكولاتة المستخدمة وخامة التغليف والسعر طبعًا.

نبتدي مع التصميمات الجاهزة اللي عجبنا منها بوكيه 16 قطعة شوكولاتة متوزعين وسط ورد لونه روز ومزروعين في أصيص زرع أبيض من أيكيا. بصراحة الشكل العام وتركيبة الألوان روعة، بس السعر كان 450 جنيه ده غير كمان مصاريف التوصيل.

خلونا نروح لشكل أرخص شوية فيه 14 قطعة شوكولاتة وسعره 220 جنيه، عبارة عن أصيص أبيض عليه ورد أحمر وفوقهم جبل الشوكولاتة. التصميم ده مش بس شكله جميل وشيك، الفكرة إنهم مخصصين جزء من العائد لصالح مؤسسة أهل مصر، وبكده هتفرح حبايبك بهديتك وفي نفس الوقت تعمل خير.

فيريرو بوكيه بيعملوا كمان بوكيهات شوكولاتة تقليدية، وفي الحالة دي بتختار ألوان التغليف والتصميم بنفسك. يعني مثلًا شوفنا على صفحتهم بوكيه 20 قطعة (280 جنيه) باللون الأحمر والأسود، ورغم إن عدد قطع الشوكولاتة هنا أكتر بس شكله مش قيم زي الحاجات اللي اتكلمنا عليها.

بصراحة الناس اللي بتحاول توصل لأحلى هدية يقدموها لحبايبهم يستحقوا كل تقدير، ومن هذا المكان بنوجه تحية كبيرة كمان لصفحات زي فيريرو بوكيه اللي مش بس بتوفر الوقت والمجهود اللي بنعمله في التدوير على الهدايا، دول كمان عندهم أفكار مبتكرة أكيد هتبهر أي حد. رابط الصفحة.