The Definitive Guide to Living in the Capital , Cairo , Egypt

محبي التكنولوجيا والتليفونات المحمولة كان عندهم سهرة جميلة من ساعات، قضوها مع مؤتمر شركة آبل العالمي. اللي بيعقد في شهر سبتمبر من كل سنة. علشان تقدم الشركة العملاقة والرائدة في مجال الاتصالات والتكنولوجيا، كل جديد في المجال ده. تعالوا نشوف مع بعض إيه الأجهزة الجديدة اللي قدمتها آبل المرة دي؟

أولًا لازم نقول لكم بعض المعلومات المهمة والطريفة عن المؤتمر.

• مؤتمر آبل السنة دي بيوافق الذكرى العاشرة، لإطلاق أول أيفون على إيد مدير أبل السابق ستيف جوبز. علشان كده بيحمل الهاتف الجديد والمميز من آبل رقم 10.
• المؤتمر عقد في قاعة بتحمل اسم الراحل ستيف جوبز. في إشارة واضحه لدوره الرئيسي في ابتكار الآيفون.
• تيم كوك أتكلم عن Apple Park، وهى منطقة ضخمة فيها مسرح ستيف جوبز. وبتعمل كلها بالطاقة النظيفة. وفيها مساحات خضراء علشان يشعر الموظفين في آبل بالراحة والعودة للطبيعة.
• المؤتمر امتاز بخفة الظل، ووجود كتير من عوامل المرح والنكتة، أثناء عرض الهواتف والتطبيقات المختلفة.

أما دلوقتي هنستعرض معاكم الجديد من آبل

جيل جديد من الساعات

قدمت الشركة جيل جديد من الساعات بأشكال مختلفة وإمكانيات حديثة. منها القادرة على  مقاومة الماء. كمان تم الإعلان عن أن السلسلة الجديدة من الساعات الذكية، هيكون معاها شريحة تجعلها وحدة مستقلة بذاتها. وممكن تعمل اتصالات وتتصفح الإنترنت والواتس آب، وغيرها من التطبيقات بدون الحاجه للتليفون الأصلي.

سعر الساعة الجديدة يبدأ من 329 دولار. وممكن تطلبها من الولايات المتحدة بداية من 15 سبتمبر.

تليفزيون آبل جديد

أما تليفزيون أبل فحصل على جيل جديد بتقنية 4K. اللي بتقدم وضوح رائع في عرض الصور على التليفزيون. بالإضافة لتقنية ألوان HDR، اللي بتخلي الألوان والرسومات أوضح وأنقى بكتير من قبل كده. بالإضافة لأن الجهاز الجديد أصبح أسرع بكتير، وأكتر قدرة على أداء كتير من المهام بفاعلية أكبر.

سعر الجهاز الجديد يبدأ من 179 دولار. وهيبدأ بيعها في 22 سبتمبر.

أيفون 8 و 8 بلس

أما بعد كده كان لازم يتم الإعلان عن التليفون الجديد من أبل، وهي سلسلة هواتف 8 و 8 بلس. واللي بتيجي بتقنية عالية جدًا في التصوير الثابت. مع وجود مجموعة كبيرة من الفلاتر السهلة والسريعة. بالإضافة للقدرة على تصوير الفيديو بجودة 4K. وكل ده بمعالج أسرع وأعلى من أي هاتف أيفون تاني تم إصداره قبل كده.

سعر الأجهزة يبدأ من 699 دولار أمريكي. على حسب النوع والمساحة التخزينية. وهيتم إتاحتهم للبيع في 16 سبتمبر.

أيفونX

ومع نهاية الحفلة وشعور الجميع أن آبل انتهت من كل عروضها، قدم تيم كوك المفاجأة النهائية والأقوى على مدار الحفل، وهى آيفون X الآيفون الأسطوري اللي بتصدره أبل بمناسبة مرور 10 سنوات على تأسيسها.

التليفون الجديد بيأتي بتصميم مختلف تمامًا، لأن الشاشة استولت على مساحة التليفون الأمامية بالكامل. وتم إلغاء الزرار الأساسي للآيفون Home، واستبداله بالضغط على الشاشة في أي مكان. كمان دلوقتي التليفون بقى بيفتح ببصمة الوجه، يعني بمجرد النظر للتليفون هيشتغل على طول. وعلشان تضمن أبل عدم التعدي على خصوصية الناس، صممت التليفون بعوامل أمان تخليه مستحيل يتفتح بدون نظر الشخص له بتركيز. علشان ماحدش يستغل نوم صاحب التليفون ويفتحه ببصمة الوجه.

مش بس كده. آبل أعلنت أن تليفونها الجديد هايتشحن بتقنية Wireless charge، بمعنى أنه مش هيحتاج يتوصل بالأسلاك علشان يشحن.

لكن علشان كل شيء له ثمن، التليفون الجديد من أبل بيبدأ بسعر 999 دولار أمريكي. وهيبدأ يتباع في الأسواق الأمريكية نهاية شهر أكتوبر الجاي.