The Definitive Guide to Living in the Capital , Cairo , Egypt

محلات منتجات العناية بالجسم بقيت موجودة ومنتشرة في كل مكان في القاهرة، أغلبها ماركات عالمية فأسعارها ممكن تعتبر غالية بالنسبة لأحجام منتجاتها. وبالرغم من أن معظم منتجات الماركات دي بـ يبقى مكتوب عليها أنها 100% طبيعية، إلا أن شكلها النهائي التجاري بـ يوحي بالعكس تمامًا. الماركة المصرية الوحيدة على الساحة هي نفرتاري – Nefertari واللي فتحت فرع جديد في المهندسين.

الفرع الجديد فتح من حوالي شهرين، وهو بالنسبة لأي حد معتاد أنه يشتري من أكشاك نفرتاري الموجودة في المولات هـ يكون أريح بكثير، أولًا لأنه واسع وطريقة العرض مريحة وتسمح لك أنك تتفرج بمزاج على مختلف المنتجات. أول ما دخلنا على الشمال لاقينا مجموعات الهدايا والموضوعة في صناديق خشبية بسيطة. عجبنا منها علبة فيها ثلاثة فوط يد بيضاء من القطن المصري العضوي، عليها موتيفات فرعونية باللون الأزرق (79 جنيه)، وواحدة ثانية فيها صابونتين وفوطة يد صغيرة عليها موتيفة عين حورس سعرها مناسب كهدية بسيطة ومبتكرة (54 جنيه). من المجموعات الأكبر فيه سلة فيها تشكيلة منتجات بنفس الرائحة زي الورد مثلًا سعرها (245 جنيه).

ثاني مجموعة لفتت نظرنا كانت مجموعة من المنتجات القطنية، أولها أحجام مختلفة من الفوط، أصغرها سعره (10 جنيه)، الوسط منها (40 جنيه)، أما بشاكير الحمام فهي الأكبر وسعرها (104 جنيه). المجموعة دي تصميمها بسيط وكلها باللون الكريمي. أما الفوط اللي تفاصيلها أكثر فعجبنا منها واحد متوسطة بنفس اللون ولكن أطرافها مزينة بكروشيه (65.50 جنيه) وواحدة ثانية عليها رسمة للملكة نفرتاري (22 جنيه). من ضمن المنتجات القطنية فيه روب الحمام بمقاسات مختلفة (214 جنيه حتى 225.25 جنيه) حتى للأطفال بمختلف الأعمار، وفيه كمان شباشب قطنية بمقاسات مختلفة (40 جنيه). الروب والشبشب ممكن تشتريهم لوحدهم أو مع بعض بسعر أقل طبعًا. وبالرغم من أننا مش مقتنعين أن الشباشب الخوص ممكن تكون مريحة للقدمين إلا أن أشكالهم عجبتنا (37 جنيه).

مجموعة الصابون كبيرة ومتنوعة الروائح والأشكال، من ضمن الروائح المختلفة الورد واللافندر وزيت الزيتون. بالرغم من أن شكلهم المربع ولونهم البني كان غير مشجع بالنسبة لنا، إلا أن مجموعة الصابون المكونة من 4 قطع برائحة الروزماري بالزيت الزيتون عجبتنا جدًا (35 جنيه)، أما القطعة الواحدة فسعرها (25 جنيه) وحجمها نسبيًا كبير، عجبتنا منها برائحة اللافندر، بنفس الحجم لاقينا مجموعة من 4 قطع موضوعة في كيس قماش مزين برسمة توضح المكون الأساسي للصابون (45 جنيه)، ولكن المجموعة دي روائحها محدودة عجبنا منها اللي برائحة الورد.

أما بالنسبة لمنتجات التجميل فالمجموعة كبيرة جدًا، من أول الماسكات زي ماسك الطمي الأبيض (39 جنيه)، أملاح الاستحمام من سفاجا، السادة منها (30 جنيه) واللى بروائح زي الورد (35 جنيه) وحتى مرطبات الشفاه (30 جنيه) ولكن للأسف الأخيرة كانت بالنسبة لنا دهنية زيادة عن اللزوم ورائحتها مش مقبولة.

اللي اكتشفناه في زيارتنا للفرع أن فيه قسم للمواد الطبيعية اللي ممكن تستخدم في الأكل زي السكر البني الطبيعي (15 جنيه) وزيت جوز الهند (36 جنيه). وزجاجات لماء الورد وروح النعناع (16 جنيه). صحيح ممكن نلاقي المنتجات دي في السوبر ماركت أو عند العطار ولكن بالنسبة لنا نفرتاري أضمن لأن معظم المنتجات اللي بـ نلاقيها عند العطار مش مكتوب عليها تاريخ صلاحية.

منتجات نفرتاري في رأينا تقدر تنافس وبقوة محلات منتجات العناية بالجسم العالمية، لأن فيها مميزات مش موجودة في الماركات الثانية أولها أنها سعرها منافس، طبيعية شكلًا ومضمونًا، ده غير أنها مصرية 100%.